काठमाडौँ । भोटेकोशी र बागलुङलगायत विभिन्न क्षेत्रमा आएको बाढीपहिरोबाट प्रभावित नागरिकको खोज, उद्धार तथा पुनःस्थापनामा सुरक्षा फौजबीच बनेको समन्वयलाई नेपाली सेनाले अनुकरणीय नमुना भनेको छ।
सेनाका प्रवक्ता राजाराम बस्नेतका अनुसार प्रतिकूल मौसम र दुर्गम भूगोलका बाबजुद नागरिकको जीवनरक्षालाई पहिलो प्राथमिकतामा राखेर खोज, उद्धार, राहत र स्थानान्तरणका कार्य सञ्चालन गरिएका थिए। सडक र पुल भत्किएर आवागमन ठप्प भएको बेला बदलिँदो परिस्थितिअनुसार आधुनिक प्रविधिको समेत प्रयोग गरिएको सेनाले जनाएको छ।
असोजमा भएको अविरल वर्षाले बागलुङ, पर्वत, म्याग्दी, मनाङ र मुस्ताङमा ठूलो जनधनको क्षति पुर्याएको थियो। जोखिमयुक्त स्थानमा रहेका १२७ जनालाई हेलिकप्टरमार्फत सुरक्षित ठाउँमा सारिएको थियो भने सडक अवरुद्ध भएका क्षेत्रमा उद्धार उपकरणमा इन्धन पुर्याउन ड्रोनसमेत चलाइएको थियो।
असोज २५ मा बुढीगण्डकीमा आएको बाढीपछि एमआई–१७ सहित चार हेलिकप्टरबाट विदेशीसहित १ हजार १०६ जनाको उद्धार गरिएको थियो। प्रभावित क्षेत्रमा १८ हजार ६८० किलोग्राम खाद्यान्न पुर्याइएको छ।
मनाङको चामेमा मस्र्याङ्दी नदीको बहाव यथावत् पार्नुका साथै अस्थायी पुल निर्माण गरी माथिल्लो मनाङसँगको आवागमन सुचारु गरिएको थियो। आरुघाटस्थित क्षतिग्रस्त पुलको ठाउँमा बेलिब्रिज जडानको तयारी भइरहेको छ भने तादी र फलाकु खोलामा एक्रोब्रिज जडान गरी रसुवालाई सडक सञ्जालसँग जोडिएको थियो।
