काठमाडौँ — राष्ट्रिय प्रजातन्त्र पार्टी (राप्रपा) ले मकवानपुर जिल्ला अध्यक्ष ऋषिलाल श्रेष्ठसँग स्पष्टीकरण मागेको छ। पार्टीबाट निलम्बनमा रहेका नेताहरूलाई जिल्लाको कार्यक्रममा सहभागी गराएको विषयमा केन्द्रीय अनुशासन समितिले उनीसँग जवाफ मागेको हो।
श्रेष्ठले आफ्नो अध्यक्षतामा आयोजना गरिएको स्वागत तथा सम्मान कार्यक्रममा बागमती प्रदेशका निलम्बित तीन मन्त्री र संसदीय दलका नेता उद्धव थापालाई अतिथिका रूपमा निम्त्याएका थिए। उनीहरूलाई कार्यक्रममा सहभागी गराउनुका साथै विभिन्न आयोजनाको निरीक्षणका नाममा आयोजनास्थलसम्म लगिएको विषय पनि समितिको ध्यानमा परेको छ।
केन्द्रीय अनुशासन समितिले पार्टीको निर्णयविपरीत निलम्बित व्यक्तिलाई कार्यक्रममा बोलाउनु अनुशासन भङ्ग भएको ठहर गरेको छ। यस्तो कार्यले पार्टीको मर्यादा र अनुशासनमाथि असर पर्ने निष्कर्ष समितिले निकालेको छ। समितिले अध्यक्ष श्रेष्ठलाई आगामी दिनमा यस्ता गतिविधि नगर्न र नगराउन सचेत गराएको छ।
समितिका अध्यक्ष तथा पार्टीका वरिष्ठ उपाध्यक्ष रोशन कार्कीको अध्यक्षतामा बसेको बैठकले निलम्बित सदस्यलाई पार्टीका कुनै पनि कार्यक्रममा सहभागी नगराउन सबै जिल्लालाई आग्रह गरेको छ। समितिका सदस्य सचिव गोपाल दाहालले बैठकको निर्णयबारे जानकारी दिएका हुन्।
पार्टीभित्र अनुशासन कायम गर्ने उद्देश्यले समितिले जिल्ला तहका गतिविधिमाथि कडाइ गरेको देखिएको छ।
