आज शारदीय नवरात्रको आठौँ दिन, महाअष्टमी, परेको छ । यस अवसरमा काठमाडौँ उपत्यकासहित देशका विभिन्न जिल्लाका शक्तिपीठ र देवी मन्दिरमा बिहानैदेखि दर्शनार्थीको ठूलो घुइँचो लागेको छ । देवीको पूजार्चनाका लागि आएका भक्तजनले मन्दिर परिसर भरिएका छन्, भने शक्तिपीठहरूलाई ध्वजापताकाले सिँगारिएको छ ।
उपत्यकाभित्रका गुह्येश्वरी, मैतीदेवी, कालिकास्थान, नक्साल भगवती, भद्रकाली, शोभा भगवती, विजेश्वरी, इन्द्रायणी, रक्तकाली, श्वेतकाली, चामुण्डामाई, सुन्दरीमाई, बज्रयोगिनी, तलेजु भवानी र टोखा चण्डेश्वरीमा भक्तजनको उल्लेख्य उपस्थिति देखिएको छ । दक्षिणकालीमा पनि बिहानैदेखि भिड लागेको छ ।
उपत्यका बाहिर गोरखाको मनकामना, ताप्लेजुङको पाथीभरा, ललितपुरको बगलामुखी, पोखराको विन्ध्यवासिनी, काभ्रेपलाञ्चोकको पलाञ्चोक भगवती, जुम्लाको चन्दननाथ, डोटीको शैलेश्वरी, डडेलधुराको उग्रतारा भगवती, बैतडीको त्रिपुरासुन्दरी, नेपालगञ्जको वागीश्वरी, सप्तरीको छिन्नमस्ता भगवती र राजदेवी, धनकुटाको जाल्पादेवी, धरानको दन्तकाली तथा बाराको गढीमाईमा पनि दर्शनार्थीको लामो लाइन लागेको छ ।
धार्मिक विश्वासअनुसार महाअष्टमीका दिन शक्तिपीठमा दर्शन गरे मनोकामना पूरा हुन्छ । यस अवसरमा महाकाली, महालक्ष्मी र महासरस्वतीको विशेष पूजा-आराधना हुने गर्छ । नौ दिनसम्म विशेष साधना र आराधना गरे इच्छा पूरा हुने जनविश्वास छ ।
