हेटौँडा उपमहानगरपालिका–१३ पदमपोखरीका किसानका लागि मेवाखेती आम्दानीको भरपर्दो स्रोत बन्दै गएको छ। व्यावसायिक रूपमा मेवा लगाउन थालेपछि यहाँका एक सयभन्दा बढी किसान यस पेसामा जोडिएका छन्।
आधामार कृषक समूहका अध्यक्ष फेन्चु लामाका अनुसार पदमपोखरीमा सात वर्षअघिदेखि व्यावसायिक मेवाखेती सुरु भएको हो। अहिले यहाँ करिब ३० हजार बोटबाट मेवा उत्पादन भइरहेको छ। सुन्तलीमाया वाइबाले एक्लै ३० कठ्ठा जमिनमा मेवा लगाएकी छन्।
अघिल्लो वर्ष पदमपोखरीबाट पाँच लाख किलोग्राम मेवा बिक्री भएको थियो। व्यापारीहरू बारीमै पुगेर मेवा किन्ने भएकाले किसानलाई बजारको चिन्ता छैन। यहाँको मेवा वीरगञ्ज, काठमाडौँ र पोखरालगायतका सहरमा पुग्ने गरेको छ। ठूलोथलीकी रञ्जुमाया घलानले आफ्नो फार्ममा ५५० बोट मेवा लगाएकी छन् र अघिल्लो वर्ष तीन लाख रुपैयाँको मेवा बेचेकी थिइन्। राम्रो आम्दानी देखेर आफू यसतर्फ आकर्षित भएको उनले बताइन्।
तर, मेवाका पात कुहिने र फल झर्ने समस्या देखिन थालेको छ। घलानका अनुसार यस्ता समस्या समाधान गर्न प्राविधिकको सल्लाह लिने गरिएको छ।
हेटौँडा उपमहानगरपालिकाले पनि मेवाखेतीसहित व्यावसायिक फलफूल र तरकारीखेतीको प्रवर्द्धन र बजारीकरणमा सहयोग गर्दै आएको छ। नगर प्रमुख मीना लामाका अनुसार दसैँअघि ‘आलीदेखि थालीसम्म’ नारासहित कृषि मेला आयोजना गरी स्थानीय उत्पादनलाई सिधै उपभोक्तासम्म पुर्याउने प्रयास गरिएको थियो। उपमहानगरको आर्थिक वर्ष २०८३/८४ को नीति तथा कार्यक्रममा युवालाई स्वरोजगार बनाउने र कृषिमा आत्मनिर्भरता बढाउने विषयलाई प्राथमिकतामा राखिएको छ।
व्यावसायिक खेती विस्तारसँगै स्थानीय रोजगारी पनि बढेको छ। कृषि उपजको ओसारपसार र आवतजावत बढेपछि पदमपोखरी क्षेत्रमा अहिले करिब २०० अटो सञ्चालनमा रहेको स्थानीय अटोचालक दीपक लामाले बताए।
