रूपन्देहीको कोटहीमाई गाउँपालिकामा एक महिलाको हत्या गरी सुनका गहना लुटेको आरोपमा प्रहरीले चार जनालाई पक्राउ गरेको छ। जिल्ला प्रहरी कार्यालय रूपन्देहीले आज सार्वजनिक गरेको विवरणअनुसार पक्राउ परेका सबै कोटहीमाई गाउँपालिका–६ का बासिन्दा हुन्।
गत कात्तिक १२ गते बिहान करिब ११ बजे कोटहीमाई–६ र ७ को बीचमा रहेको धानखेतमा कोटहीमाई–५ छोट्की मझगाँवा निवासी ४१ वर्षीया जुबेदा खातुन धोबीको शव फेला परेको थियो। प्रहरीका अनुसार उनको टाउकोमा कोदालोको बिँडले प्रहार गरिएको थियो भने घाँटीमा हँसियाले घोपेर हत्या गरिएको थियो। घटनापछि उनले कानमा लगाएका सुनका गहना पनि लुटिएको प्रहरीले जनाएको छ।
अनुसन्धानका क्रममा प्रहरीले खजनी चोकका ४० वर्षीय बैजनाथ यादव, सोही ठाउँका ३० वर्षीय प्रमोदकुमार कुर्मी, बोगडीका २६ वर्षीय मन्जे हरिजन र मर्चवारीका ३५ वर्षीय धर्मराज यादवलाई नियन्त्रणमा लिएको हो।
पक्राउ परेका चारै जनालाई रूपन्देही जिल्ला अदालतमा उपस्थित गराइएको थियो। अदालतले कात्तिक १६ गते ज्यानसम्बन्धी, करणीसम्बन्धी तथा चोरी र डाँकासम्बन्धी कसुरमा अनुसन्धान गर्न म्याद थप गरेको छ। जिल्ला प्रहरी कार्यालय रुपन्देहीका प्रहरी निरीक्षक चन्द्रकिशोर शाहका अनुसार घटनाबारे थप अनुसन्धान भइरहेको छ।
