वैदेशिक रोजगारीका क्रममा ज्यान गुमाएका नेपाली श्रमिकका परिवार तथा आफन्तको पर्खाइ सहज बनाउन त्रिभुवन अन्तर्राष्ट्रिय विमानस्थलमा प्रतीक्षालय तथा विश्राम कक्ष सञ्चालनमा आएको छ।
वैदेशिक रोजगार बोर्डको १८औं स्थापना दिवसको अवसरमा बुधबारदेखि उक्त सेवा सुरु गरिएको हो। विदेशमा ज्यान गुमाएका श्रमिकको शव स्वदेश ल्याउने प्रक्रियामा परिवारले विमानस्थलमा लामो समय कुर्नुपर्ने अवस्था रहँदै आएको छ। त्यही पर्खाइलाई केही सहज बनाउने उद्देश्यले प्रतीक्षालय स्थापना गरिएको बोर्डले जनाएको छ।
बोर्डका कार्यकारी निर्देशक निर्मलकुमार उप्रेतीले श्रमिकको हित, सुरक्षा र कल्याणका लागि बोर्डको कामलाई थप प्रभावकारी बनाउँदै लैजाने प्रतिबद्धता व्यक्त गरेका छन्। उनले विदेशमा नेपाली श्रमिक अंगभंग हुने वा ज्यान गुमाउने अवस्था आउन नदिन सचेतनामूलक कार्यक्रम सञ्चालन भइरहेको बताए।
बोर्डले पूर्वप्रस्थान अभिमुखीकरण तालिमलाई व्यवस्थित र प्रभावकारी बनाउने, डिजिटल सामग्री समुदायस्तरसम्म पुर्याउने, नयाँ तथा फलदायी श्रम गन्तव्य पहिचान गर्ने र गन्तव्य मुलुकसँग गरिने श्रम सम्झौतामा श्रमिकको हित र सामाजिक सुरक्षाका विषय समेट्न समन्वय गर्दै आएको छ।
त्यसैगरी विदेशबाट फर्किएका श्रमिकको पुनः एकीकरणमा सहयोग पुर्याउने, सिपमूलक तालिम सञ्चालन गर्ने र सिप प्रमाणीकरणमा सहायता गर्ने कामलाई पनि थप प्रभावकारी बनाइने बोर्डले जनाएको छ।
