नेपाल टेलिकमले आफ्नो खरिद प्रक्रियाबारे विभिन्न सञ्चारमाध्यममा आएका समाचार भ्रमपूर्ण र अपुष्ट रहेको बताएको छ। कम्पनीले मंगलबार विज्ञप्ति जारी गर्दै समाचार सम्प्रेषण गर्नुअघि आधिकारिक पुष्टि गर्न आग्रह गरेको हो।
विज्ञप्तिमा टेलिकमले प्रचलित कानुन र सुशासनका मान्यताअनुसार काम गर्दै आएको उल्लेख गरेको छ। दूरसञ्चार उपकरण तथा सेवा खरिद गर्दा कम्पनीको आर्थिक विनियमावली, सम्बन्धित कार्यविधि, सार्वजनिक खरिद ऐन र सार्वजनिक खरिद अनुगमन कार्यालयले जारी गरेको स्ट्यान्डर्ड बिड डकुमेन्टका आधारमा प्रक्रिया अपनाइने गरिएको कम्पनीको भनाइ छ।
सहरी क्षेत्रदेखि देशका विकट ठाउँसम्म गुणस्तरीय दूरसञ्चार सेवा पुर्याउँदै आएको टेलिकमले नयाँ प्रविधिको प्रयोग, सेवाको गुणस्तर सुधार र सरकारका नीतिगत लक्ष्य पूरा गर्न विभिन्न काम गरिरहेको जनाएको छ। कम्पनीले आफ्नो लामो इतिहास, संस्थागत प्रतिष्ठा, जनविश्वास र ग्राहकको भरोसालाई महत्वपूर्ण सम्पत्ति भनेको छ।
समाचार प्रकाशन तथा प्रसारण गर्नुअघि आवश्यक आधिकारिक जानकारी कम्पनीका प्रवक्ता, सूचना अधिकारी, सहप्रवक्ता तथा सूचना तथा प्रकाशन शाखाबाट लिन सकिने टेलिकमले जनाएको छ। प्रवक्ता डा. कमल लामिछानेद्वारा जारी विज्ञप्तिमा अपुष्ट समाचार सम्प्रेषण नगर्न र कम्पनीको हित तथा प्रतिष्ठा बढाउन सकारात्मक सहयोग गर्न सञ्चारमाध्यमलाई आग्रह गरिएको छ।
