पोखरा — पर्यटकीय याम सुरु भएसँगै कास्कीको सिक्लेस गाउँमा पर्यटकको उल्लेख्य आगमन भएको छ। पछिल्लो छ दिनमा मात्र तीन हजारभन्दा बढी पर्यटकले गाउँको भ्रमण गरेका छन्।
मादी गाउँपालिका–१ का वडाध्यक्ष देविजङ्ग गुरुङका अनुसार कात्तिक १५ देखि २० गतेसम्म (नोभेम्बर १–६) को अवधिमा तीन हजार १४६ जना पर्यटक सिक्लेस पुगेका छन्। यस हिसाबले गाउँमा दैनिक औसत ५२४ जना पर्यटक भित्रिएका छन्।
छ दिनको तथ्याङ्क हेर्दा सबैभन्दा धेरै पर्यटक कात्तिक १८ गते पुगेका थिए। सो दिन एकै पटक ७१९ जना पर्यटक गाउँ आइपुगेका थिए भने सबैभन्दा कम कात्तिक १५ गते २५४ जना मात्र पुगेका थिए।
गाउँ पुगेका अधिकांश पर्यटकले सिक्लेसमा बसाइँपछि प्रख्यात गन्तव्य कोरी तथा हिमनदी ताल कपुचेतर्फको पदयात्रा तय गर्ने वडाध्यक्ष गुरुङले जानकारी दिए। पर्यटकको उत्साहजनक आगमनले स्थानीय होटल तथा होमस्टे व्यवसायीमा नयाँ उत्साह थपेको छ।
पोखराबाट करिब ३८ किलोमिटरको दूरीमा रहेको सिक्लेसमा करिब ४०० घरधुरी छन्। गाउँमा गुरुङ समुदायको बाहुल्यता रहेको छ।
