सिरहा — राति सडकमा शंकास्पद रूपमा हिँडिरहेका दुई जनाको साथबाट प्रहरीले नक्कली नोटजस्ता देखिने ठूलो रकम बरामद गरेको छ।
शनिबार राति करिब ११ बजे सिरहा नगरपालिका–७ मा पर्ने महावीर चोकदेखि शिव चोकतर्फ जाने हुलाकी सडकखण्डमा गस्तीमा रहेको प्रहरी टोलीले दुई जनालाई रोकेर जाँच गरेको थियो। जाँचका क्रममा उनीहरूको साथबाट ५०० रुपैयाँ दरका ३ थान र १ हजार रुपैयाँ दरका २४ थान गरी जम्मा २५ हजार ५०० रुपैयाँ बराबरका नोट फेला परेका हुन्। ती नोट नक्कलीजस्ता देखिएको प्रहरीले जनाएको छ।
पक्राउ परेका व्यक्तिहरू कल्याणपुर नगरपालिका–८ का ३५ वर्षीय मोहम्मद मुस्तुफा हुसेन र ३२ वर्षीय समिर मियाँ हुन्। उनीहरूलाई रकमसहित नियन्त्रणमा लिएर जिल्ला प्रहरी कार्यालय सिरहामा राखिएको छ। घटनाबारे थप अनुसन्धान भइरहेको प्रहरीले जनाएको छ।
जिल्ला प्रहरी कार्यालय सिरहाका प्रवक्ता तथा प्रहरी नायब उपरीक्षक रमेशबहादुर पालले बरामद रकम नक्कली नोटजस्तो देखिएको र पक्राउ परेका दुवै जनामाथि विस्तृत अनुसन्धान भइरहेको बताए। नोटहरू कहाँबाट ल्याइएका थिए, कहाँ प्रयोग गर्ने तयारी थियो र यसमा अरू कोही संलग्न छन् कि छैनन् भन्नेबारे प्रहरीले खोजबिन गरिरहेको छ। अनुसन्धान पूरा भएपछि मात्र थप विवरण सार्वजनिक गरिने प्रहरीको भनाइ छ।
