काठमाडौं — सर्वोच्च अदालतका न्यायाधीश हरि फुयाल बिदामा बसेका छन्। उनी तिहार बिदापछि मात्र अदालत फर्कनेछन्। सर्वोच्च अदालत प्रशासनका अनुसार उनले मंगलबारदेखि शुक्रबारसम्म बिदा लिएका हुन्। शुक्रबारपछि तिहार बिदा सुरु हुन्छ र आगामी साताभर तिहारका कारण सार्वजनिक बिदा रहन्छ। त्यसैले उनी ३० कात्तिकमा अदालतमा हाजिर हुने गरी बिदामा बसेका छन्।
उच्चपदस्थ अधिकारीहरूसँग भेटघाट मिलाउने प्रयास गरेको आरोपमा पक्राउ परेका इनम सापकोटासँग होटल हिमालयमा भेटेको विवरण सार्वजनिक भएपछि न्यायाधीश फुयालमाथि प्रश्न उठेको थियो। विवरण बाहिरिएपछि उनले आफूले सापकोटालाई भेटेको स्वीकार गर्दै त्यस भेटले विचाराधीन मुद्दामा कुनै प्रभाव नपरेको स्पष्टीकरण दिएका थिए।
विवादमा मुछिएपछि न्यायाधीश फुयाल बिदामा बसेको खबरले न्यायपालिकामा थप चर्चा चुलिएको छ। उनी बिदामा रहँदा यो प्रकरणबारे छानबिन र त्यसको प्रक्रियाबारे प्रश्नहरू कायमै छन्। ३० कात्तिकमा उनी अदालत फर्किएपछि यो विषयले कस्तो मोड लिन्छ भन्ने हेर्न बाँकी छ।
