ओखलढुङ्गामा सम्पन्न दशौँ व्याकुल माइला गोल्डकप फुटबल प्रतियोगिताको उपाधि ज्वालामुखी युवा समूह हर्कपुरले उचालेको छ। मानेभञ्ज्याङ गाउँपालिका–६, सोक्मटारको दूधकोशी नदी किनारस्थित ब्आलेम बगर खेलमैदानमा आज भएको फाइनलमा निर्धारित समय गोलरहित बराबरीमा सकिएपछि खेल ट्राइब्रेकरमा पुगेको थियो। पेनाल्टी सुटआउटमा सप्तरङ्गी युवा समूह फोकुललाई ५–४ गोल अन्तरले हराउँदै ज्वालामुखीले उपाधि आफ्नो पक्षमा पारेको हो।
‘खेलकुदको माध्यमबाट विकासको अभियान’ भन्ने नारासहित राष्ट्रिय गीतका सर्जक प्रदीपकुमार राई (व्याकुल माइला) को जन्मथलोमा नयाँ नेपाल सरोकार समाजले प्रतियोगिता आयोजना गरेको थियो। विजेता टोलीले तीन लाख ३३ हजार ३३३ रुपैयाँ र उपविजेताले एक लाख ५० हजार १११ रुपैयाँ पुरस्कार पाए। सेमिफाइनलसम्म पुगेका दूधकौशिका आधारभूत विद्यालय र मानेभञ्ज्याङ युवा समूहले जनही ८० हजार रुपैयाँ प्राप्त गरे।
प्रतियोगितासँगै सम्पन्न तेस्रो रूपा स्मृति महिला फुटबलको उपाधि ओखलढुङ्गाले जित्यो। ओखलढुङ्गा र खोटाङबीचको फाइनल पनि गोलरहित बराबरीपछि ट्राइब्रेकरमा गएको थियो, जहाँ ओखलढुङ्गा ३–१ गोल अन्तरले विजयी बन्यो। महिलातर्फ विजेताले २५ हजार र उपविजेताले १५ हजार रुपैयाँ नगद पुरस्कार पाए।
कात्तिक ९ गतेदेखि सुरु भएको प्रतियोगिता आज सम्पन्न भएको हो। विजेतालाई नेपाली कांग्रेसका सहमहामन्त्री रामहरि खतिवडा र सर्जक व्याकुल माइलाले पुरस्कार वितरण गरे। विक्रम संवत् २०६८ सालदेखि निरन्तर हुँदै आएको प्रतियोगिताका लागि मानेभञ्ज्याङ गाउँपालिकाले १० लाख रुपैयाँ बजेट छुट्याएको थियो। बाढीले क्षति पुर्याएको खेलमैदान मर्मत गरी व्यवस्थित बनाएपछि यस वर्ष प्रतियोगिता सञ्चालन गरिएको आयोजकले जनाएको छ।
