काठमाडौं । भारतका विदेश सचिव विक्रम मिस्री दुई दिने नेपाल भ्रमणमा छन् । यसपटक उनको भ्रमणमा एउटा नयाँ दृश्य देखिएको छ — उनले कुनै पनि राजनीतिक दलका नेताहरूलाई भेट्ने छैनन् ।
विगतमा भारतबाट कुनै उच्चस्तरीय भ्रमण हुँदा राजनीतिक दलका नेताहरू भेट्न लाइन लाग्ने गर्थे । पूर्वप्रधानमन्त्रीदेखि पार्टी अध्यक्षसम्मका शीर्ष नेताहरू भारतीय प्रतिनिधिमण्डल बसेकै होटलमा पुग्थे । कतिपय अवस्थामा भारतीय प्रतिनिधिहरू नै पार्टी अध्यक्ष तथा पूर्वप्रधानमन्त्रीलाई भेट्न जान्थे । तर यसपटक त्यो परम्परा तोडिएको छ ।
सम्भवतः औपचारिक भ्रमणमा आएका भारतीय कूटनीतिज्ञले नेपालका कुनै पनि राजनीतिक दलका शीर्ष नेतालाई नभेटेको यो पहिलो पटक नै होला । विगतमा एक दिनका लागि आउँदा पनि मुख्य दलका शीर्ष नेताहरूलाई अवश्य भेटिन्थ्यो । तर विदेश सचिव मिस्रीले आफ्नो भेटघाटको तालिकामा राजनीतिक दलका नेताहरूसँगको भेटघाट राखेका छैनन् ।
अन्तर्राष्ट्रिय मामिलाका जानकार विनोज बस्न्यातले यसलाई राम्रो सुरुवात भनेका छन् । भारतले राजनीतिक दलहरूसँग नअल्झिएर सिधै सरकारसँग सम्बन्ध बनाएर काम गर्न चाहेको सन्देश दिएको उनको बुझाइ छ । अर्का जानकार पूर्वराजदूत विजयकान्त कर्णले भने राजनीतिक दलका नेतालाई भेट्दा सम्बन्ध झन् राम्रो हुने बताए । उनले समय अभावका कारण पनि भेट नभएको हुन सक्ने बताए ।
यसअघि उच्चस्तरीय भ्रमण हुँदा पाहुनाको सम्मानमा आयोजना गरिने रात्रिभोजमा प्रमुख दलका शीर्ष नेताहरूलाई बोलाइन्थ्यो । यसपटक त्यो पनि छैन । भारतीय दूतावासले पनि कार्यक्रम आयोजना गरेर प्रमुख दलका नेताहरूलाई भेटघाट गराउने गर्थ्यो, तर यसपटक त्यो पनि राखिएको छैन । भोलि प्रधानमन्त्री बालेन्द्र शाहलाई भेटेर आन्तरिक छलफल गरी विदेश सचिव मिस्री फर्किने कार्यक्रम छ ।
