नेपाली टेनिस खेलाडी अभिषेक बास्तोला अस्ट्रेलियन ओपन २०२७ को एसिया/प्यासिफिक वाइल्ड कार्ड प्लेअफमा प्रतिस्पर्धा गर्ने भएका छन्। उनी यो छनोट खेल्ने पहिलो नेपाली खेलाडी हुन्।
चीनको छेन्दुमा नोभेम्बर २३ देखि २८ सम्म आयोजना हुने प्रतियोगितामा अभिषेकले एकल विधामा नेपालको प्रतिनिधित्व गर्नेछन्। नेपाल खेलकुद पत्रकार मञ्चमा बुधबार आयोजित पत्रकार सम्मेलनमा उनले अस्ट्रेलियन ओपन खेल्ने आफ्नो लामो समयदेखिको सपना पूरा हुन लागेको बताए।
एसिया/प्यासिफिक क्षेत्रका खेलाडीलाई अस्ट्रेलियन ओपनको मुख्य प्रतियोगितासम्म पुग्ने अवसर दिने उद्देश्यले प्लेअफ आयोजना गर्न लागिएको हो। अस्ट्रेलियन ओपन विश्वकै प्रतिष्ठित टेनिस प्रतियोगितामध्ये एक हो र यसलाई एसिया/प्यासिफिक क्षेत्रको ग्रान्डस्लामका रूपमा चिनिन्छ।
प्लेअफमा अस्ट्रेलिया बाहेक एसिया/प्यासिफिक क्षेत्रका देशका खेलाडीले सहभागिता जनाउन पाउनेछन्। पुरुष र महिला दुवैतर्फ विश्व वरीयतामा १०५ वा सोभन्दा पछाडि रहेका खेलाडीका लागि प्रतियोगिता खुला गरिएको छ।
छनोट चरणका लागि उपलब्ध चार वाइल्ड कार्डमध्ये एक अभिषेकले प्राप्त गरेका छन्। छनोट चरणमा आठ खेलाडीबिच प्रतिस्पर्धा हुनेछ र त्यसबाट शीर्ष चार खेलाडी मुख्य ड्रमा प्रवेश गर्नेछन्। मुख्य ड्रमा यसअघि नै वरीयताका आधारमा छनोट भएका १२ खेलाडीले प्रतिस्पर्धा गर्नेछन्।
अभिषेक नेपालबाट चारपटक एसियाली खेलकुद खेल्ने खेलाडी हुन्। अन्तर्राष्ट्रिय प्रतियोगितामा नेपालको प्रतिनिधित्व गर्दै आए पनि राज्य र सम्बन्धित खेल संघबाट उचित सहयोग नपाएको गुनासो उनले पत्रकार सम्मेलनमा गरेका छन्।
