बागमती प्रदेशका मुख्यमन्त्री किरण थापा मगरले नागरिकको गुनासो सिधै सुन्ने नयाँ अभ्यास थालेका छन्। मंगलबार साँझ ६ः०३ बजे उनको फेसबुक पेजबाट सार्वजनिक भएको एक मिनेट ५६ सेकेन्डको भिडियोमा मुख्यमन्त्रीले एक नागरिकसँग टेलिफोनमा कुराकानी गरेको देखिन्छ।
‘जनतासँग मुख्यमन्त्री’ नाम दिइएको यो कार्यक्रमअन्तर्गत सार्वजनिक गरिएको ह्वाट्सएप नम्बरमा आएका गुनासो मुख्यमन्त्री आफैंले फोन गरेर सुन्छन् र त्यसको भिडियो सार्वजनिक गर्छन्।
पहिलो भिडियोमा ललितपुरको कोन्ज्योसोम गाउँपालिका–२, शंखुका स्थानीय अनूप शर्माको गुनासो सुनिएको छ। शर्माले कान्ति लोकपथसँग जोड्ने सडक खण्डमा गएको भीषण पहिरोले भट्टेडाँडातर्फको बाटोको ट्रयाक नै बगाएको, बस्तीका घरहरू जोखिममा परेको र स्थानीयको आवतजावत पूर्ण रूपमा ठप्प भएको जानकारी गराएका थिए।
मुख्यमन्त्री थापाले हात्तीसारस्थित भू–तथा जलाधार संरक्षण कार्यालयमा निवेदन दिन आग्रह गर्दै तत्कालै स्थलगत अध्ययनका लागि प्राविधिक टोली खटाउने प्रतिबद्धता जनाए। समय अनुकूल भए आफू स्वयं पनि उक्त क्षेत्रको निरीक्षणमा पुग्ने आश्वासन उनले दिए।
मुख्यमन्त्रीको यो पहललाई लिएर मिश्रित प्रतिक्रिया देखिएको छ। कतिपयले यसलाई प्रचारको शैली भनेका छन् भने कतिपयले नागरिकप्रतिको जवाफदेहिताको सुरुवातका रूपमा व्याख्या गरेका छन्।
कार्यक्रमको दीर्घकालीन व्यवस्थापनबारे भने मुख्यमन्त्री मौन देखिएका छन्। प्रमुख सचिव कमलप्रसाद भट्टराईले निर्देशिका तयार गर्ने काम भइरहेको र सोसँगै काम थालिएको बताए। उनका अनुसार कार्यविधिभन्दा जनताको कामलाई प्राथमिकतामा राखिएको छ।
तर ‘हेलो सीएम’ डेस्क प्रभावकारी बन्न सकेको छैन। मुख्यमन्त्री तथा मन्त्रिपरिषद् कार्यालयका सहप्रवक्ता असिम लामाका अनुसार जनशक्ति, स्पष्ट कार्यविधि र बजेटरी संयन्त्रको अभाव छ। नयाँ संगठन तथा व्यवस्थापन सर्वेक्षणमार्फत ‘हेलो सीएम कक्ष’ स्वीकृत भए पनि कर्मचारी व्यवस्थापन हुन नसकेको उनले बताए।
हालसम्म हेलो सीएममा १०० भन्दा बढी उजुरी तथा गुनासो दर्ता भइसकेका छन्। प्रदेश सरकारको बजेट लाइन आइटममा आधारित भएर प्रदेश सभाबाट पारित हुने भएकाले आकस्मिक शीर्षकमा पर्याप्त रकम र कार्यविधि नभई तत्काल बजेट निकासा गर्न नसकिने लामाको भनाइ छ।
