चीनसँग जोडिने मुस्ताङको कोरला नाका यतिबेला बाढी र हिउँको दोहोरो मारमा परेको छ। भदौमा भोटेकोशीको बाढीले रसुवागढी नाका बगाएपछि कोरला व्यापारको मुख्य विकल्प बनेको थियो, तर असोज ११ गते कालीगण्डकीमा आएको बाढीले बेनी–कोरला सडक ठाउँठाउँमा भत्कायो। मर्मतपछि सडक खुलेर असोजको अन्त्यतिर नाका सञ्चालनमा आएको थियो।
कात्तिक १२ गतेपछि अर्नब चक्रवातको प्रभावमा उपल्लो मुस्ताङमा बाक्लो हिउँ पर्यो। कोरला नाकादेखि १४ किलोमिटर यता न्हेचुङसम्मको सडक हिउँले पुरिएपछि आवागमन ठप्प भएको छ। केही ठाउँमा दुई फिटसम्म हिउँ जमेको छ भने तापक्रम माइनस पाँचदेखि ११ डिग्रीसम्म झरेको छ।
लोमान्थाङ गाउँपालिकाको नेतृत्वमा हिउँ पन्छाउने काम चार दिनदेखि चलिरहेको छ। चीनको झोङ्बा काउन्टी जनसरकारले पनि डोजर पठाएर सहयोग गरेको छ। गाउँपालिका अध्यक्ष टसीनर्बु गुरुङका अनुसार बिहीबारदेखि आवागमन धेरै सहज हुने विश्वास छ।
तर नाकामा नेपालतर्फ अझै एक हजार सात सय गाडी जाँचपास हुन बाँकी छ। चालु आर्थिक वर्ष २०८३/८४ मा अहिलेसम्म सात हजार एक सय विद्युतीय गाडी कोरला नाकाबाट भित्रिएका छन्। बाढीपछि सडक खुलेपछि चार हजार चार सय ३७ गाडी आयात भएको सशस्त्र प्रहरी बल नम्बर ३३ गुल्मले जनाएको छ।
नाकामा पूर्वाधारको अभाव भने उस्तै छ। भन्सार कार्यालय सीमाबाट १३ किलोमिटर तल नेचुङमा छ र अहिले प्रमुखविहीन छ। अध्यागमन कार्यालय २०८१ कात्तिकमा उद्घाटन भए पनि लामो समय ताला लागेको थियो र २०८२ कात्तिक २१ गतेदेखि मात्र पुनः सञ्चालनमा आएको हो। क्वारेन्टाइनका लागि बनेको भवनमा प्रहरी बसेका छन्। एकीकृत भन्सार र सुख्खा बन्दरगाहका लागि करिब एक हजार रोपनी जग्गा प्राप्त भए पनि स्थायी संरचना बन्न सकेको छैन।
