हङकङको लोकतन्त्र पक्षधर आन्दोलनका चर्चित अनुहार जोसुवा वङले अब थप एक दशक कारागारमा बिताउनुपर्ने भएको छ। विदेशी शक्तिसँग मिलेमतो गरेको अभियोगमा अदालतले बिहीबार ३० वर्षीय वङलाई १० वर्षको कैद सजाय सुनाएको हो। यो सजाय हङकङको राष्ट्रिय सुरक्षा कानुनअन्तर्गत दिइएको हो।
वङ यसअघि नै अर्को अभियोगमा सजाय भोगिरहेका थिए र आगामी जनवरीमा छुट्ने अवस्थामा थिए। तर नयाँ फैसलाले उनको कारावास लामो समय थपिएको छ। अदालतले नयाँ सजायको दुई महिना दुई दिन भने पुरानो सजायसँगै जोडेर गणना हुने बताएको छ।
अभियोजन पक्षले वङले निर्वासनमा रहेका अभियन्ता नाथन ल लगायतसँग मिलेर बेइजिङविरुद्ध अन्तर्राष्ट्रिय प्रतिबन्ध र नाकाबन्दी लगाउन पहल गरेको दाबी गरेको थियो। सन् २०२० को जुलाईदेखि नोभेम्बरसम्मका गतिविधिलाई विदेशी शक्तिसँगको साँठगाँठका रूपमा लिइएको हो। वङले गत सेप्टेम्बरमा उक्त अभियोग स्वीकार गरेका थिए।
सन् २०२० मा चीनले हङकङमा राष्ट्रिय सुरक्षा कानुन लागू गरेपछि वङसहित सयौँ लोकतन्त्र समर्थक अभियन्ता पक्राउ परेका थिए। मानव अधिकारवादीहरूले उक्त कानुनले असहमतिको आवाज दबाएको आरोप लगाउँदै आएका छन् भने हङकङका अधिकारीहरूले शान्ति र स्थायित्वका लागि कानुन आवश्यक रहेको बताउँदै आएका छन्।
वङका साथी तथा अभियन्ता फ्रान्सिस हुईले फैसलाप्रति दुःख र आक्रोश व्यक्त गर्दै यसलाई हङकङको लोकतन्त्रवादी पुस्ताको योगदान मेटाउने राजनीतिक दमनको अंश भनेकी छन्। वङले १४ वर्षको उमेरमा सन् २०११ मा विद्यार्थी समूह ‘स्कलरिज्म’ स्थापना गरेर राजनीतिक अभियान थालेका थिए। सन् २०१४ को ‘अम्ब्रेला मुभमेन्ट’ र सन् २०१९ को लोकतन्त्र समर्थक आन्दोलनमा उनी अग्रपंक्तिमा थिए। राष्ट्रिय सुरक्षा कानुन लागू भएपछि उनको राजनीतिक दल ‘डेमोसिस्टो’ विघटन भएको थियो।
यसअघि सञ्चार उद्यमी तथा लोकतन्त्र समर्थक जिमी लाइलाई पनि सोही अभियोगमा २० वर्षको जेल सजाय सुनाइएको थियो।
