प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले देश गम्भीर संकटमा रहेको बेला सरकारको ध्यान गलत ठाउँमा केन्द्रित भएको आरोप लगाएका छन्। बिहीबार सामाजिक सञ्जालमार्फत आफ्नो धारणा सार्वजनिक गर्दै उनले नागरिक विपद् र महँगीको मारमा परिरहेका बेला सरकार भने प्रहरी महानिरीक्षक हटाउने काममै व्यस्त देखिएको बताए। अझै १७ महिना कार्यकाल बाँकी रहेका प्रहरी प्रमुखलाई हटाउनुपर्ने बाध्यता के हो भन्ने प्रश्न पनि उनले सरकारसँग सोधेका छन्। भोटेकोशी र बूढीगण्डकीको बाढीले धेरै नागरिक पीडामा रहेको, विस्थापित सुकुम्बासीको अवस्था बेहाल रहेको र महँगीले जनजीवन आक्रान्त बनेको अवस्थामा सरकारको प्राथमिकता उल्टो दिशामा गएको उनको भनाइ छ। प्रहरी प्रमुखलाई कुन तथ्य र प्रमाणका आधारमा हटाउन खोजिएको हो भन्ने जवाफ सरकारले दिनुपर्ने उनले माग गरेका छन्। सत्तारूढ दलभित्रै यस विषयमा फरक–फरक भनाइ आएकोतर्फ पनि उनले ध्यान खिचेका छन्। सरकारका प्रवक्ताले पार्टीको निर्देशनमा हटाइएको बताउने तर राष्ट्रिय स्वतन्त्र पार्टीका प्रवक्ताले पार्टीको निर्देशन नभएको बताउने अवस्थाले सरकार कसको निर्देशनमा चलिरहेको छ भन्ने प्रश्न उठेको उनको टिप्पणी छ। प्रहरीले अनुसन्धानका लागि बरामद गरेको एक बिचौलियाको मोबाइल प्रधानमन्त्रीका प्रमुख राजनीतिक सल्लाहकारको घरमा पुगेको विषयमा पनि उनले प्रश्न उठाएका छन्। त्यो मोबाइल त्यहाँ किन पुग्यो र त्यसमा के मेटाउन खोजिएको थियो भन्ने जवाफ खोजिनुपर्ने उनले बताए। जनताले सुशासन, भ्रष्टाचार अन्त्य र सहज जनजीवनका लागि वर्तमान सरकारलाई मत दिएको स्मरण गराउँदै उनले सत्ता शक्तिको दुरुपयोग गरेर प्रहरी प्रशासनलाई नियन्त्रणमा राख्ने प्रयास भइरहेको आरोप लगाए।