लन्डन — संस्कृति, पर्यटन तथा नागरिक उड्डयनमन्त्री खड्गराज पौडेल ‘गनेस’ले जलवायु परिवर्तनका कारण पर्यटन क्षेत्रमा बढ्दै गएको जोखिम न्यूनीकरण गर्न समुदायलाई केन्द्रमा राखेर काम गर्नुपर्नेमा जोड दिएका छन्। प्रभावकारी सरकारी सहयोग र संस्थागत सहकार्यबिना दिगो पर्यटन सम्भव नहुने उनको भनाइ छ।
बेलायतको लन्डनमा नोभेम्बर ४ मा सम्पन्न विश्व यात्रा बजार (डब्ल्यूटीएम) को २०औँ मन्त्रीस्तरीय शिखर सम्मेलनमा सहभागी हुँदै मन्त्री पौडेलले नेपालको अनुभव प्रस्तुत गरेका हुन्। विश्व यात्रा तथा पर्यटन परिषद् र संयुक्त राष्ट्रसंघीय पर्यटनको संयुक्त आयोजनामा भएको सम्मेलन ‘बदलिँदो विश्व परिवेशमा पर्यटन क्षेत्रको उत्थानशीलता अभिवृद्धि’ विषयमा केन्द्रित थियो। बेन थम्पसनले सञ्चालन गरेको छलफलमा विभिन्न देशका पर्यटनमन्त्री तथा सार्वजनिक र निजी क्षेत्रका प्रतिनिधिको सहभागिता थियो।
छलफलमा मन्त्री पौडेलले भोटेकोशीमा आएको आकस्मिक बाढीबाट भएको मानवीय क्षति र पर्यटन पूर्वाधारमा पुगेको नोक्सानीलाई जलवायु परिवर्तनले पर्यटन क्षेत्रमा निम्त्याउन सक्ने जोखिमको उदाहरणका रूपमा प्रस्तुत गरे। यस्ता विपद्ले पर्यटकीय गन्तव्य, पूर्वाधार र स्थानीय समुदायको जीविकोपार्जनमा समेत चुनौती थपिरहेको उनले बताए।
पर्यटन क्षेत्रलाई विपद् तथा जलवायुजन्य जोखिमबाट जोगाउन समुदाय, सरकार र सुदृढ संस्थाहरूको सहभागितामा आधारित प्रभावकारी सङ्कट व्यवस्थापन प्रणाली विकास गर्नुपर्नेमा उनले जोड दिए। समुदायलाई विपद् व्यवस्थापन र पर्यटन विकासको केन्द्रमा राख्दै सरकारी सहयोग र संस्थागत क्षमता बढाउन सके मात्रै पर्यटन क्षेत्र दिगो र उत्थानशील बन्ने उनको भनाइ थियो।
सम्मेलनमा सहभागी मन्त्री तथा अन्तर्राष्ट्रिय पर्यटन क्षेत्रका प्रतिनिधिले विश्वव्यापी अनिश्चितता र बदलिँदो परिस्थितिका बीच पर्यटन क्षेत्रको जोखिम सामना गर्ने क्षमता अभिवृद्धि, सार्वजनिक–निजी सहकार्य र दिगो पर्यटन विकासका विषयमा अनुभव तथा धारणा आदानप्रदान गरेका थिए।
