नेपाल उद्योग वाणिज्य महासङ्घका वरिष्ठ उपाध्यक्ष अञ्जन श्रेष्ठले मुलुकमा बाह्य लगानी आकर्षित गर्न सर्वप्रथम स्वदेशी निजी क्षेत्र र स्थानीय लगानीकर्तालाई उत्साहित बनाउनुपर्ने बताएका छन्। नेपाल पूर्वाधार सम्मेलनको पूर्वसन्ध्यामा आयोजित पत्रकार सम्मेलनमा बोल्दै उनले स्वदेशी व्यवसायीको मनोबल नबढेसम्म विदेशी लगानी आउन नसक्ने स्पष्ट पारे।
संसद्मा सांसदले व्यक्त गरेको भनाइ उद्धृत गर्दै श्रेष्ठले भने, घरका कुलदेवतालाई खुसी नपारेसम्म बाहिरका देवता भित्र्याउन सकिँदैन, त्यसैले सरकारले पहिले मुलुकभित्रकै निजी क्षेत्रलाई ढुक्कसँग काम गर्ने वातावरण, प्रोत्साहन र उत्प्रेरणा दिनुपर्छ।
मुलुकको आर्थिक समृद्धि र व्यापारिक प्रतिस्पर्धाका लागि कमजोर पूर्वाधार नै सबैभन्दा ठुलो चुनौती रहेको उनको भनाइ थियो। लजिस्टिक र कार्यदक्षता कमजोर रहेको, भन्सारमा सामान छुटाउन र पूर्व–पश्चिम ढुवानी गर्न निकै लामो समय लाग्ने उनले बताए। व्यवसायलाई प्रतिस्पर्धी बनाउन आधुनिक पूर्वाधारको विकास अपरिहार्य रहेको उनको तर्क छ।
यसैगरी, विदेशी लगानीमा बन्ने ठुला आयोजनाहरूमा स्वदेशी निर्माण कम्पनीहरूलाई पनि ज्वाइन्ट भेन्चरमा अनिवार्य समावेश गराउनुपर्ने माग श्रेष्ठले राखे। दिल्ली मेट्रो र नेपालकै नागढुंगा सुरुङ मार्ग निर्माणका क्रममा स्थानीय इन्जिनियर तथा प्राविधिकहरूले सीप सिकेको प्रसङ्ग जोड्दै उनले यस्तो सहकार्यले नेपाली कम्पनीहरूको क्षमता अभिवृद्धि हुने उल्लेख गरे। सरकारले लगानीमैत्री वातावरणका लागि विभिन्न ऐन संशोधनको प्रक्रिया अघि बढाएकोमा स्वागत गर्दै उनले पूर्वाधार सम्मेलनलाई सफल बनाउन महासङ्घका तर्फबाट पूर्ण सहयोग र सहकार्य रहने प्रतिबद्धता व्यक्त गरे।
