नेपाली कांग्रेसका सभापति गगनकुमार थापाले विवादास्पद अडियो प्रकरणमा आफ्नो नाम जोडिएपछि आफू कुनै पनि गलत वा अनैतिक गतिविधिमा संलग्न नरहेको बताएका छन्। सामाजिक सञ्जालमार्फत भिडियो सन्देश जारी गर्दै उनले पार्टी सबै प्रकारका निष्पक्ष छानबिनका लागि तयार रहेको बताए।
थापाले आफ्नो नैतिकतामाथि प्रश्न उठाउनुपर्ने कुनै आधार नरहेको जिकिर गरेका छन्। उनले कार्यकर्तालाई आफ्नो पक्षमा ढुक्क भएर बोल्न आग्रह गरेका छन्।
प्रहरी हिरासतमा रहेका इनम सापकोटाको भनिएको अडियोमा आफ्नो नाम जोडिएको विषयमा आफूलाई कुनै जानकारी नभएको उनको भनाइ छ। अडियो कहाँ, कसले, कहिले र किन बोल्यो भन्ने कुरा अनुसन्धानको विषय भएको र छानबिन निष्पक्ष हुनुपर्ने उनले बताएका छन्। सत्य तथ्य छुट्टिने गरी अनुसन्धान हुनुपर्ने उनको माग छ।
कांग्रेसको आधिकारिकता र आन्तरिक रूपान्तरणका लागि भएको संघर्षमा कुनै आर्थिक लेनदेन नभएको पनि उनले स्पष्ट पारेका छन्। उनले उक्त संघर्षलाई कार्यकर्ताहरूको विद्रोहको संज्ञा दिँदै करोडौँ रुपैयाँको लेनदेन भएको भन्ने आरोप अस्वीकार गरेका छन्।
यस विषयमा महामन्त्री विश्वप्रकाश शर्माले पार्टी कार्यालयबाटै धारणा सार्वजनिक गरिसकेको उल्लेख गर्दै थापाले अडियोको स्रोत, त्यसमा बोलिएका विषय र त्यसको उद्देश्यबारे निष्पक्ष अनुसन्धान हुनुपर्ने बताएका छन्।
अडियो सार्वजनिक भएपछि आफू डराएर विभिन्न राजनीतिक दलका शीर्ष नेताहरूलाई भेट्न गएको भन्ने चर्चाबारे उनले आफू डराउने स्वभावको व्यक्ति नै नभएको जवाफ दिएका छन्।
