काठमाडौं । प्रधानमन्त्री तथा मन्त्रिपरिषद्को कार्यालयले संविधानले दिएको पूर्ण प्रेस स्वतन्त्रताप्रति सरकार दृढ रहेको स्पष्ट पारेको छ ।
नियमित पत्रकार सम्मेलनमार्फत कार्यालयका प्रवक्ता एवं सहसचिव हेमराज अर्याल तथा प्रधानमन्त्रीकी प्रेस विज्ञ दीपा दाहालले सरकारका पछिल्ला कामकारबाही, निर्णय, विकास आयोजनाको प्रगति तथा समसामयिक विषयमा जानकारी गराएका हुन् ।
ब्रिफिङको अन्त्यमा बोल्दै प्रधानमन्त्रीकी प्रेस विज्ञ दाहालले सरकार प्रेस स्वतन्त्रताको पक्षमा स्पष्ट रहेको बताइन् । पूर्ण प्रेस स्वतन्त्रता संवैधानिक व्यवस्था भएको र सरकार त्यसको पक्षमा रहेको उनको भनाइ थियो । मिडियाले उठाएका हरेक सवालप्रति सरकार सजग रहेको, सरकारका काम नागरिकसम्म पुर्याउन सञ्चार जगत्को भूमिका महत्त्वपूर्ण रहेको र साझा प्रयासबाट मात्र परिवर्तन सम्भव हुने उनले बताइन् ।
प्रधानमन्त्री कार्यालयको निर्देशनमा मिडिया हाउसमा पुगेर पत्रकारहरूलाई प्रहरीले नियन्त्रणमा लिएको विषयमा चर्को आलोचना भइरहेको र नेपाल पत्रकार महासङ्घले आन्दोलन घोषणा गरेपछि त्यसबारे प्रधानमन्त्री तथा मन्त्रिपरिषद्को कार्यालयले प्रस्टीकरण दिएको हो ।
सरकार प्रेस स्वतन्त्रताको रक्षा र पत्रकारको सुरक्षाप्रति प्रतिबद्ध रहेको कार्यालयले दोहोर्याएको छ । मिडियासँगको सहकार्यलाई निरन्तरता दिँदै सरकारका कामबारे नागरिकलाई जानकारी गराउने काम अघि बढाइने बताइएको छ ।
