‘पूर्णबहादुरको सारङ्गी’बाट दर्शकको मन जितेको जोडी विजय बराल र अञ्जना बराइली फेरि एउटै फिल्ममा देखिने भएका छन् । उनीहरूको आगामी फिल्म ‘सिन्दुरे जात्रा’को फर्स्टलुक पोस्टर सार्वजनिक भएको छ, जसले फिल्मप्रति दर्शकको कौतुहलता बढाएको छ ।
सार्वजनिक पोस्टरमा दुवै कलाकार निकै भावुक अवस्थामा देखिएका छन् । विजयको छातीमा टाँसिएकी अञ्जना आँसु झारिरहेकी छन् भने विजयको आँखामा पनि पीडा झल्किन्छ । गाउँले परिवेश, मन्दिर र जात्रामा सहभागी मानिसहरूको भीडले फिल्मको कथा ग्रामीण समाज र त्यहाँको जनजीवनसँग जोडिएको संकेत गर्छ ।
अञ्जनाको परम्परागत पहिरन र गहनाले गाउँले परिवेशलाई थप जीवन्त बनाएको छ । उनको बिग्रिएको कपाल र दुवै पात्रको भावुक अवस्थाले उनीहरू कुनै गम्भीर परिस्थिति वा घटनामा फसेको हुन सक्ने अनुमान गर्न सकिन्छ । यद्यपि निर्माण पक्षले पोस्टरमार्फत फिल्मको वास्तविक कथा भने खुलाएको छैन ।
सरोज पौडेलको निर्देशनमा बनेको यो फिल्ममा विजय र अञ्जना मुख्य भूमिकामा छन् । ‘पूर्णबहादुरको सारङ्गी’को सफलतापछि उनीहरू दोस्रोपटक एउटै फिल्ममा देखिन लागेका हुन्, त्यसैले यो जोडीको पुनरागमनलाई दर्शकले चासोका साथ हेर्ने अपेक्षा गरिएको छ ।
सारङ्गी फिल्म्सको प्रस्तुतिमा बनेको फिल्ममा विनोद न्यौपाने, उषा खड्गी, रामप्रसाद खनाल, लोकेन्द्र लेखक, कमलमणि नेपाल, भोला राज सापकोटा र हिउँवाला गौतमलगायत कलाकारको पनि अभिनय छ । निर्देशक पौडेलकै कथामा आधारित फिल्मको पटकथा तथा संवाद सबिन अधिकारी र वसन्त न्यौपानेले लेखेका हुन् । नेम महर्जन निर्माता रहेको फिल्ममा प्रशान्त सिवाकोटी, रिदम कँडेल र नन्दु परियारको संगीत रहनेछ । ‘सिन्दुरे जात्रा’ आगामी मंसिर १८ गतेदेखि देशभर प्रदर्शनमा आउनेछ ।
