नेपालले विश्वकप छनोट प्लेअफको आफ्नो यात्रा इटलीविरुद्धको खेलबाट सुरु गर्ने भएको छ। अन्तर्राष्ट्रिय क्रिकेट परिषदले शुक्रबार सार्वजनिक गरेको खेलतालिकाअनुसार नेपाल र इटलीबीचको पहिलो खेल ४ डिसेम्बरमा कीर्तिपुरस्थित त्रिभुवन विश्वविद्यालयको मैदानमा हुनेछ।
प्लेअफ आगामी ४ देखि २१ डिसेम्बरसम्म नेपालमा आयोजना हुँदैछ। कीर्तिपुरको टीयू मैदान र मुलपानी मैदानमा खेलिने प्रतियोगितामा नेपालसहित आठ टोलीले प्रतिस्पर्धा गर्नेछन्। नेपालले दोस्रो खेल ६ डिसेम्बरमा युगान्डासँग, तेस्रो खेल १० डिसेम्बरमा युएईसँग र चौथो खेल १२ डिसेम्बरमा जर्सीसँग खेल्नेछ। त्यसपछि १४ डिसेम्बरमा क्यानडा, १८ डिसेम्बरमा नामिबिया र २१ डिसेम्बरमा कुवेतसँग भिडन्त हुनेछ।
लिग २ को पुछारमा रहेका नामिबिया, नेपाल, क्यानडा र ओमानसँगै च्यालेन्ज लिगबाट छनोट भएका इटली, कुवेत, युगान्डा र जर्सी यस प्लेअफमा सहभागी छन्। सहभागी टोलीबीच एकल चरणको राउन्ड रोबिन खेल हुनेछ। त्यसबाट शीर्ष चारमा रहने टोली सन् २०२७ मा हुने एकदिवसीय विश्वकपको ग्लोबल क्वालिफायरमा प्रवेश गर्नेछन्।
लिग २ को शीर्ष चारमा रहेका अमेरिका, स्कटल्यान्ड, नेदरल्यान्ड्स र ओमान भने सिधै ग्लोबल क्वालिफायरमा पुगिसकेका छन्। ग्लोबल क्वालिफायरमा कुल १० टोलीले प्रतिस्पर्धा गर्नेछन्। घरेलु मैदानमा हुने प्लेअफमा नेपालको प्रदर्शनमाथि समर्थकको नजर रहनेछ।
