काठमाडौँ । निषेधित क्षेत्रमा आवश्यक अनुमति नलिई पदयात्रा गराएको भन्दै अध्यागमन विभागले एउटा ट्राभल्स कम्पनी र चार जना विदेशी नागरिकमाथि कारबाही गरेको छ ।
डोल्पा जिल्लाको निषेधित क्षेत्र तल्लो डोल्पामा पदयात्रा अनुमतिबिना मेक्सिकोका चार जना नागरिक प्रवेश गरेको पाइएपछि विभागले कारबाही अघि बढाएको हो । जिल्ला प्रशासन कार्यालय, डोल्पाबाट प्राप्त पत्रका आधारमा छानबिन गर्दा प्रचलित कानुनको पालना नगरी विदेशी नागरिकलाई निषेधित क्षेत्रमा पदयात्रा गराएको ठहर भएको विभागले जनाएको छ ।
पदयात्रा गराउने माउन्ट रोज टुर्स एन्ड ट्राभल्स प्रालिलाई अध्यागमन ऐन, २०४९ को दफा १० (४) बमोजिम ५० हजार रुपैयाँ जरिवाना गरिएको छ । त्यसैगरी अनुमति नलिई निषेधित क्षेत्रमा प्रवेश गरेका मेक्सिकोका चारै जना नागरिकलाई जनही १० हजार रुपैयाँका दरले जरिवाना गरिएको छ । उनीहरूबाट पदयात्रा अनुमति लिँदा लाग्ने दस्तुरबापत प्रतिव्यक्ति २० अमेरिकी डलरसमेत असुल गरिएको विभागले जानकारी दिएको छ ।
नेपालको पदयात्रा पर्यटनलाई सुरक्षित, व्यवस्थित र मर्यादित बनाउन पदयात्रासम्बन्धी कानुनी प्रावधान तथा अनुमति प्रणालीको पूर्ण पालना गर्नुपर्ने विभागले स्पष्ट पारेको छ । विशेष गरी निषेधित क्षेत्रमा प्रवेश गर्दा अध्यागमन नियमावली, २०५१ को नियम ३२ बमोजिम आवश्यक प्रक्रिया पूरा गरी पदयात्रा अनुमति लिनुपर्ने व्यवस्था छ ।
विभागले विदेशी नागरिक, ट्रेकिङ एजेन्सी तथा सम्बन्धित सरोकारवालालाई निषेधित क्षेत्रमा पदयात्रा गराउँदा अनिवार्य रूपमा अनुमति लिन र प्रचलित कानुनी व्यवस्थाको पूर्ण पालना गर्न आग्रह गरेको छ ।
