काठमाडौं । अमेरिकी विदेशमन्त्री मार्को रुबियोले अमेरिकाले युक्रेनलाई दिँदै आएको सहयोग रोक्ने कुनै निर्णय नभएको स्पष्ट पारेका छन् । मङ्गलबार युक्रेनी राष्ट्रपति भोलोदिमिर जेलेन्स्कीसँग भएको ४५ मिनेटको टेलिफोन वार्तामा उनले राष्ट्रपति डोनाल्ड ट्रम्पले युक्रेनलाई हानि पुर्याउने वा मद्दत रोक्ने कुनै निर्देशन नदिएको जानकारी दिएका हुन् ।
सञ्चारकर्मीहरूसँग कुरा गर्दै रुबियोले गुप्तचर सूचना, हतियार बिक्री तथा स्टारशिल्ड उपग्रह प्रणालीमा पेन्टागन वा ह्वाइट हाउसले कुनै कटौती नगरेको बताए । नाटो सदस्य देशहरूले भुक्तानी गरिसकेका प्याट्रिओट इन्टरसेप्टर युक्रेन पुग्न ढिलाइ भएको स्वीकार गर्दै उनले यसको कारण विश्वभरका अमेरिकी सैन्य आधारको सुरक्षाका लागि आफ्नो भण्डार सन्तुलन राख्नु रहेको बताए ।
हालै रुसले हानेका ब्यालिस्टिक क्षेप्यास्त्रबारे युक्रेनलाई पूर्व जानकारी नदिनु अमेरिकाको नियोजित कदम नभई प्राविधिक त्रुटि भएको उनको दाबी छ । रुबियोका अनुसार असत्य आरोपहरूले ट्रम्पलाई मर्माहत र आक्रोशित बनाएको छ, भने दुई वर्षदेखि शान्ति वार्तामा कुनै उल्लेख्य प्रगति नहुँदा राष्ट्रपति रुष्ट छन् ।
वार्तापछि सामाजिक सञ्जाल एक्समा लेख्दै राष्ट्रपति जेलेन्स्कीले रुबियोको सहयोगी तत्परता र स्पष्ट दृष्टिकोणका लागि आभार व्यक्त गर्दै ब्यालिस्टिक इन्टरसेप्टर, समयमै पाइने पूर्व चेतावनी र स्टारलिङ्क–स्टारशिल्ड प्रणालीका अवरोधहरू तत्काल हटाउन माग गरेका छन् ।
यसैबीच, ह्वाइट हाउसका विशेष दूत स्टिभ विटकफ मङ्गलबार नर्वेको राजधानी ओस्लो पुगेका छन् । त्यहाँ उनले युरोपेली नेताहरूसँग मिलेर रुसी राष्ट्रपति भ्लादिमिर पुटिनसमक्ष पेस गरिने नयाँ शान्ति प्रस्ताव तयार पार्ने छन्, त्यसपछि उनी मस्को प्रस्थान गर्ने कार्यक्रम रहेको छ ।
