काठमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले कर्णालीको समृद्धिको जग पहिलो गणतान्त्रिक सरकारले नै हालेको बताएका छन् । कर्णाली र अन्य पिछडिएका क्षेत्रलाई अगाडि बढाउनकै लागि सिंहदरबारको अधिकार गाउँगाउँसम्म पुर्याइएको उनको भनाइ छ ।
लेखक डा. दीपेन्द्र रोकाया र मोहनदास मानन्धरद्वारा लेखिएको ‘कर्णाली उपेक्षा र उज्यालो’ पुस्तक विमोचन गर्दै दाहालले आफू प्रधानमन्त्री हुँदा कर्णालीमा पूर्वाधार विकासको काम सुरु भएको स्मरण गरे । विभेदमा परेका समुदाय र क्षेत्रलाई समृद्धिको नयाँ यात्रामा लैजाने लक्ष्यसहित ती काम अघि बढाइएको उनले बताए ।
पूर्व–पश्चिम मध्यपहाडी राजमार्ग र उत्तर–दक्षिण कोरिडोरको निर्माणले मुलुकलाई झन् एकताबद्ध बनाएको उनको तर्क थियो । ती सडक बनेपछि कर्णालीका स्याउ बाहिरी जिल्लामा पुर्याउन र तराईका अन्नबाली कर्णाली लैजान सहज भएको उनले भने । यस्तो विकास रणनीतिक सोच भएको नेतृत्वबिना सम्भव नहुने उनको भनाइ थियो ।
पहिलो गणतान्त्रिक सरकारका पालामा १० हजार ८०० मेगावाट क्षमताको कर्णाली–चिसापानी आयोजना तथा तिला–१ र तिला–२ आयोजनालाई अघि बढाउन पहल गरिएको पनि उनले जानकारी दिए । त्यसैगरी, हिल्सा–सुर्खेत सडक निर्माणमा चीनको सहयोग लिने विषयमा सैद्धान्तिक सहमति भएको उनले स्मरण गरे ।
