काठमाडौं । नेपाली कांग्रेसका नेता डा. प्रकाशशरण महतले पार्टीको आधिकारिकता विवादमा सर्वोच्च अदालतको पुनरावलोकन प्रक्रियाबाट आफ्नो समूहले न्याय पाउने विश्वास व्यक्त गरेका छन्।
शनिबार काठमाडौंमा आयोजित जिल्ला सम्मेलनको उद्घाटन समारोहलाई सम्बोधन गर्दै महतले अदालतले यसअघिको फैसलामा कमजोरी रहेको स्वीकार गर्दै पुनरावलोकनको अनुमति दिएको स्मरण गराए। सोही कारण अन्तिम निर्णय आफूहरूको पक्षमा आउने उनको भनाइ थियो।
‘देशमा अझै न्याय जीवित छ भने पुनरावलोकनमार्फत आधिकारिकता हामीले नै पाउँछौं,’ महतले भने। न्यायको पक्षमा फैसला हुनेमा आफू विश्वस्त रहेको उनले बताए।
महतले शेरबहादुर देउवाको नेतृत्वमा रहेको कांग्रेसले मात्र पार्टीको विचार र सिद्धान्त बोकेको दाबी गरे। आफूहरूले विधि र प्रक्रिया पालना गरेको उनको जिकिर थियो।
उनले मूलधारको कांग्रेसले बीपी कोइरालाको प्रजातान्त्रिक समाजवाद छोडेको आरोप पनि लगाए। महतका अनुसार अहिले मूलधारले सामाजिक प्रजातन्त्रको कुरा गर्न थालेको छ, जुन राष्ट्रिय स्वतन्त्र पार्टी र गगन थापा नेतृत्वको कांग्रेसको पनि एजेन्डा हो। यसले पार्टीभित्रको संस्कार नै हराएको उनको टिप्पणी थियो।
