काठमाडौं — अपाङ्गता भएका व्यक्तिहरूका मुद्दामा संसदमा आवाज उठाउँदा पनि त्यसको खासै सुनुवाइ नहुने सांसद गंगा छन्त्यालले बताएकी छन्। अपाङ्गताका विषयलाई दयाको भावनाले हेरिने गरेको र कानुन बनाउने थलोमा यसको प्राथमिकता नपरेको उनको भनाइ छ।
बागलुङबाट महिला आदिवासी जनजाति समूहबाट समानुपातिकतर्फ छनौट भएकी छन्त्याल आफै पनि अपाङ्गता भएकी महिला हुन्। उनी १० वर्षदेखि महिला आदिवासी, जनजाति र अपाङ्गता भएका व्यक्तिहरूका सवालमा आवाज उठाउँदै आएकी छन्। यस क्रममा उनले स्वीट्जरल्यान्ड, मलेसिया, थाइल्यान्ड, कम्बोडिया, अस्ट्रिया र अमेरिकालगायत देशको भ्रमण गरिसकेकी छन्।
संसदमा पुगेपछि बोल्ने र पहिरन लगाउने प्रस्तुतिबारे धेरै कुरा सिकेको उनले बताइन्। तर हरेकचोटि अपाङ्गताका सवालमा बोल्दा पनि धेरै सांसदका लागि यो नयाँ विषय भएकाले दयाको भावनाले हेरिने गरेको उनको अनुभव छ। कतिपय कानुन राम्रा भए पनि कार्यान्वयनको पाटो फितलो देखिएको भन्दै उनले विशेषगरी अपाङ्गता ऐन २०७४ लाई संशोधन गर्नुपर्ने बताइन्।
समाजमा सबैभन्दा पछाडि परेको समुदाय दलित भएको र अहिले आफ्नो विशेष प्राथमिकता अपाङ्गता भएका व्यक्तिहरूमा रहेको उनले बताइन्। अपाङ्गताभित्रको विविधतालाई पहिचान गरेर त्यसैअनुसार नीति र कानुन बनाउनुपर्ने उनको धारणा छ। अपाङ्ग महासङ्घभित्र ५–६ सय वटा अपाङ्ग संस्था आबद्ध रहेको र तिनले आ–आफ्नो विधान र उद्देश्यअनुसार काम गरिरहेको उनले जानकारी दिइन्।
नयाँ सरकार आएको ६ महिना भएको र यति छिटै परिवर्तन नदेखिने उनले स्वीकारिन्। अपाङ्गताका विषय छायामा परेको जस्तो लागेको भन्दै उनले मन्त्रालयमा कुरा राख्दा पनि धेरै मेहनत गर्नुपर्ने बताएकी छन्। अपाङ्गता भएको व्यक्तिलाई दयाले होइन, प्राथमिकतामा राखेर काम गर्नुपर्ने उनको सन्देश छ।
