इजिप्टको गिजा प्रान्तमा आइतबार दुई रेल एकआपसमा ठोक्किँदा दर्जनौँ यात्रु घाइते भएका छन्। इजिप्टको राष्ट्रिय रेलवे प्राधिकरणले दुर्घटनाको पुष्टि गर्दै घाइतेहरूलाई उपचारका लागि अस्पताल लगिएको जनाएको छ।
काएरो–आस्वान रेलमार्गको गिजा–फायुम खण्डमा एउटा रेलले अर्को रेललाई पछाडिबाट ठक्कर दिएको थियो। ठक्करका कारण दुवै रेलका यात्रुहरू घाइते भएका हुन्। दुर्घटनापछि घटनास्थलमा आपतकालीन टोली र क्रेनहरू परिचालन गरिएको छ। क्षतिग्रस्त डिब्बाहरू हटाएर दुवै दिशामा रेल सेवा छिटोभन्दा छिटो सुचारु गर्ने प्रयास भइरहेको प्राधिकरणले जनाएको छ।
इजिप्टको सरकारी पत्रिका अल–योमले दिएको प्रारम्भिक विवरणअनुसार दुर्घटनामा ६० जना घाइते भएका छन्। घाइतेहरूको अवस्थाबारे थप विवरण आउन बाँकी छ। दुर्घटनाको कारणबारे भने अहिलेसम्म केही सार्वजनिक गरिएको छैन।
