काठमाडौं । भारतले सुधाकर दलेलालाई नेपालका लागि राजदूतमा नियुक्त गरेको छ । भारतीय विदेश मन्त्रालयले शुक्रबार विज्ञप्ति जारी गर्दै दलेलाको नियुक्तिबारे औपचारिक जानकारी गराएको हो । उनी छिट्टै काठमाडौं आइपुगेर जिम्मेवारी सम्हाल्ने विज्ञप्तिमा उल्लेख छ ।
दलेला हाल भारतीय विदेश मन्त्रालयमा आर्थिक सम्बन्ध सचिवका रूपमा कार्यरत छन् । विदेश मन्त्रालयकै सचिव स्तरका करियर कूटनीतिज्ञलाई नेपालका लागि राजदूत बनाएर पठाउनु भारतका लागि पहिलो पटकजस्तै भएको टिप्पणी गरिएको छ । विदेश सचिवबाहेक मन्त्रालयमा अन्य चार सचिव रहने व्यवस्था छ ।
सन् १९९३ मा भारतीय परराष्ट्र सेवामा प्रवेश गरेका दलेला अनुभवी कूटनीतिज्ञ हुन् । त्यसअघि उनी भुटानका लागि भारतीय राजदूतका रूपमा तीन वर्ष सेवा गरिसकेका छन् । अहिले उनी भारतको आर्थिक कूटनीति, ग्लोबल साउथसँगको विकास साझेदारी, अफ्रिकासँगको सम्बन्ध र उदाउँदा रणनीतिक प्रविधिका विषयहरू हेरिरहेका छन् ।
दलेलाले तेल अभिभबाट आफ्नो कूटनीतिक यात्रा सुरु गरेका थिए । त्यसपछि उनले ब्रासिलिया, शिकागो, ढाका, जेनेभा, थिम्पु र वासिङ्टन डी.सी.स्थित भारतीय नियोगहरूमा सेवा गरे । सन् २००९ देखि २०११ सम्म उनी प्रधानमन्त्री कार्यालयमा निर्देशक थिए । सन् २००६ देखि २००७ सम्म उत्तर विभागका निर्देशक र सन् २०१६ देखि २०१९ सम्म सोही विभागका सहसचिव भएर उनले भुटान र नेपाल मामिला नजिकबाट हेरेका थिए । व्यापार नीति र विश्व व्यापार संगठनको भारतीय नियोगमा समेत उनको अनुभव रहेको छ ।
