काठमाडौं । लोक तथा दोहोरी गायक शङ्कर क्षेत्रीले आफ्नो नयाँ देउसी–भैलो गीतलाई लिएर उठेको विवादमा आफ्नो धारणा सार्वजनिक गरेका छन्। गीतमा सरकारको विरोध गरिएको भन्दै आलोचना हुन थालेपछि उनले सामाजिक सञ्जालमार्फत स्पष्टीकरण दिएका हुन्।
क्षेत्रीले गीतमा देशका समस्या उजागर गर्दै तिनको समाधानका लागि सुझाव मात्र दिएको बताए। दर्शकलाई गीतलाई विरोधका रूपमा नभई देश सुधारको सुझावका रूपमा बुझिदिन उनले आग्रह गरे।
केही दिनअघि सार्वजनिक भएको ‘हामीलाई जागिर चाहियो’ गीतमा सहकारी ठगी प्रकरण र राष्ट्रिय स्वतन्त्र पार्टीका सभापति रवि लामिछानेलाई लक्षित गरिएको आरोप लागेको छ। त्यसपछि सामाजिक सञ्जालमा उनको चर्को आलोचना र बहिष्कारको माग उठेको थियो।
गीतमा देशको वर्तमान अवस्था, बेरोजगारी, भ्रष्टाचार र राजनीतिक विकृतिमाथि व्यङ्ग्य गरिएको छ। युवाको मुख्य समस्या जागिरको माग गर्दै नेताहरू किन चुपचाप छन् भन्ने प्रश्न उठाइएको छ। विकास निर्माणमा भएको ढिलाइ र भ्रष्टाचारमाथि व्यङ्ग्य गर्दै सहकारी ठगलाई कारबाही नभएकोमा असन्तुष्टि व्यक्त गरिएको छ।
गीतमा क्षेत्रीसहित सपना मगर, रेणु लामिछाने, प्रमेश घिमिरे, प्रेम वि.के. र सन्देश सुवेदीले स्वर दिएका छन्। शब्द, सङ्गीत र निर्देशन स्वयम् क्षेत्रीले गरेका हुन्।
