चालु आर्थिक वर्ष २०८३/८४ को पहिलो तीन महिनामा नेपालमा पौने १२ करोड रुपैयाँ बराबरको तास भित्रिएको छ । भन्सार विभागको पछिल्लो तथ्यांकअनुसार साउनदेखि असोजसम्मको अवधिमा ११ करोड ६८ लाख १५ हजार रुपैयाँ बराबरको तास आयात भएको हो ।
यस अवधिमा ३४ लाख २२ हजार ६ सय ६१ बट्टा तास नेपाल भित्रिएको छ । दसैं र तिहारलाई लक्षित गरेर ठूलो परिमाणमा तास आयात हुने गरेको तथ्यांकले देखाएको छ ।
आयात भएको तासबाट सरकारले पहिलो त्रैमासमै ७ करोड ७ लाख ७४ हजार रुपैयाँ भन्सार राजस्व सङ्कलन गरेको छ । यो रकम तासको खरिद मूल्यको करिब ६० प्रतिशत बराबर हो ।
एकातिर नेपाल प्रहरीले गाउँ र सहरमा तास खेल्नेहरूलाई धरपकड गरिरहेको हुन्छ भने अर्कोतिर भन्सार नाकाबाट लाखौँ बट्टा तास निर्बाध रूपमा भित्रिइरहेको छ ।
नेपालको कानुनले जादु देखाउन वा अन्य खेलका लागि भन्दै तासलाई मनोरञ्जनको साधनका रूपमा आयात गर्न छुट दिएको छ । तर व्यवहारमा आयात हुने यी लाखौँ बट्टा तासको मुख्य प्रयोग जुवाकै रूपमा हुने गरेको देखिन्छ ।
तास आयातको यो तथ्यांकले कानुन र व्यवहारबिचको खाडल मात्र होइन, राज्यले राजस्वका लागि नागरिकलाई अपराधको बाटोमा जान अप्रत्यक्ष रूपमा साधन कसरी सुम्पिरहेको छ भन्ने पनि छर्लङ्ग देखाएको छ ।
