अमेरिकी राष्ट्रपति डोनाल्ड ट्रम्पले अवैध आप्रवासीविरुद्ध आफ्नो प्रशासनले अपनाएको नीति आवश्यकताभन्दा बढी कठोर भएको स्वीकार गरेका छन्।
सीबीएस टेलिभिजनको ‘६० मिनेट्स’ कार्यक्रममा दिएको अन्तर्वार्तामा उनले सामूहिक रूपमा आप्रवासीलाई देशनिकाला गर्ने नीतिका कारण राजनीतिक रूपमा समेत क्षति पुगेको बताए।
ट्रम्पले आफ्नो कार्यकालमा अमेरिकी सीमाबाट अवैध रूपमा भित्रिने आप्रवासीको संख्या उल्लेख्य रूपमा घटेको दाबी गरे। त्यस उपलब्धिका लागि आफूले ‘ए प्लस’ अङ्क पाउनुपर्ने उनको भनाइ थियो।
अपराधमा संलग्न व्यक्तिलाई देशबाट निकाल्ने काममा पनि आफूले उच्च मूल्याङ्कन पाउनुपर्ने उनले बताए।
गत मंगलबार सम्पन्न मध्यावधि निर्वाचनमा आप्रवासनको मुद्दा आफ्नो रिपब्लिकन पार्टीका लागि फाइदाजनक र नोक्सानदायी दुवै बनेको ट्रम्पले उल्लेख गरे।
यसैबीच, अमेरिकी गृह सुरक्षा विभागले अवैध आप्रवासीविरुद्ध अपनाइएको कडा नीतिबाट सरकार पछि नहट्ने स्पष्ट पारेको छ।
निर्वाचनका दिन गरिएको सर्वेक्षणअनुसार आप्रवासन मतदाताका लागि तेस्रो सबैभन्दा महत्त्वपूर्ण चुनावी मुद्दा बनेको थियो।
