झापा । पूर्वी नेपालको प्रमुख व्यापारिक नाका काँकडभिट्टाबाट गत असोज महिनामा मात्र झन्डै ९९ करोड रुपैयाँ बराबरको अलैँची भारततर्फ पठाइएको छ । मेची भन्सार कार्यालयले सार्वजनिक गरेको विवरणअनुसार सो अवधिमा पाँच लाख ४१ हजार ९४० केजी अलैँची निर्यात भएको हो, जसको मूल्य रु ९८ करोड ८८ लाख ८४ हजार रहेको छ ।
कार्यालयका सूचना अधिकारी माङ्कल राईका अनुसार असोजमा अलैँचीपछि सबैभन्दा धेरै मूल्यको निर्यात चियाको भएको छ । एक महिनामा १७ लाख १५ हजार ९३२ केजी चिया निर्यात हुँदा रु ४९ करोड ५४ लाख ५२ हजार आम्दानी भएको छ । त्यस्तै एक लाख १८ हजार ४४४ केजी प्लाइउड निर्यातबाट रु ४४ करोड २३ लाख ४८ हजार र १३ लाख १९ हजार १४० केजी अम्रिसोबाट रु आठ करोड ९५ लाख ५० हजार प्राप्त भएको छ ।
अलैँची, चिया र प्लाइउड झापा, इलाम, पाँचथर र ताप्लेजुङमा उत्पादन हुने प्रमुख निर्यातजन्य वस्तु हुन् । यी जिल्लामा उत्पादित वस्तु काँकडभिट्टा नाकाबाट भारततर्फ जाने गर्दछन् ।
सोही महिनामा ४६ हजार ७४५ केजी छुर्पी निर्यातबाट रु आठ करोड ९५ लाख ३६ हजार, २० लाख ८० हजार ७६३ केजी फलामे पाताबाट रु २९ करोड ८४ लाख ६७ हजार र ४८ हजार ३१८ केजी सुकुटीबाट रु चार करोड ८३ लाख १८ हजार आम्दानी भएको भन्सार कार्यालयले जनाएको छ ।
