काठमाडौँ । नेपाली निर्देशक राज सरगम (राजकुमार लामिछाने) ले रुसमा हुने अन्तर्राष्ट्रिय चलचित्र पिचिङ कार्यक्रममा आफ्नो नयाँ चलचित्र परियोजना प्रस्तुत गर्ने भएका छन् । रुसको नेसनल सेन्टर ‘रसिया’ ले बिहीबार आयोजना गर्न लागेको ‘सिनेमा एज अ टुल फर फाइटिङ फ्युचरसक’ कार्यक्रममा उनले ‘गादी : द सेक्रेट प्लेस’ नामक परियोजना प्रस्तुत गर्नेछन् ।
विश्वभरका युवा चलचित्रकर्मीले भविष्यप्रतिको चिन्ता र डरलाई सकारात्मक दृष्टिकोणमा बदल्ने परियोजना प्रस्तुत गर्ने यस कार्यक्रममा सहभागी हुन विदेशी चलचित्रकर्मीबाट १७ वटा आवेदन परेका थिए । तीमध्ये छनोट भएका उत्कृष्ट परियोजनामा नेपालको ‘गादी : द सेक्रेट प्लेस’ पनि परेको छ ।
चलचित्रले नेपाली समाजमा प्रचलित परम्परा, आस्था, लैङ्गिक भूमिका र सांस्कृतिक पहिचानका विषयलाई उठाएको छ । यसकी मुख्य पात्र भवानी नेपालकै एक गाउँकी १६ वर्षीया किशोरी हुन् । व्याख्या गर्न नसकिने शारीरिक कम्पनको समस्याबाट पीडित भएपछि उनी समाजमा स्थापित मान्यता र परम्परालाई चुनौती दिन बाध्य हुन्छिन् । आध्यात्मिक तथा सामाजिक अधिकार पुरुषमा मात्र सीमित रहेको समाजमा भवानीले आफ्नो भाग्य आफैँ निर्धारण गर्ने प्रयास गर्छिन् ।
चलचित्रको एउटा निर्णायक दृश्यमा पुरुषले भवानीलाई काँधमा बोक्छन् । नेपाली परम्परामा धामीझाँक्रीलाई मात्र यसरी बोक्ने प्रचलन रहेको सन्दर्भमा उक्त दृश्यलाई सांस्कृतिक परम्परा र लैङ्गिक समानताबीचको सम्बन्धको प्रतीकका रूपमा प्रस्तुत गरिएको छ ।
निर्देशक सरगमले लैङ्गिक समानता र पुस्तौँदेखि चल्दै आएका सामाजिक मान्यतामाथि प्रश्न उठाउने स्वतन्त्रतासम्बन्धी चिन्ताले चलचित्र निर्माण गर्न प्रेरित गरेको बताएका छन् । सांस्कृतिक परम्परालाई समावेशी बनाउँदै त्यसको मौलिकता कायम राख्न सकिने सम्भावना चलचित्रमार्फत खोजिएको उनको भनाइ छ ।
नोभेम्बर १३ सम्म आयोजना हुने तेस्रो अन्तर्राष्ट्रिय सिम्पोजियम ‘क्रिएटिङ द फ्युचर’ को प्रमुख कार्यक्रमका रूपमा चलचित्र पिचिङ आयोजना हुँदैछ । रुसको विज्ञान तथा प्रविधि दशकअन्तर्गत परराष्ट्र मन्त्रालय र विज्ञान तथा उच्च शिक्षा मन्त्रालयको सहयोगमा सिम्पोजियम आयोजना हुन लागेको हो ।
