काठमाडौं । पछिल्लो २४ घण्टामा देशका विभिन्न ठाउँमा भएका सवारी दुर्घटनामा पाँच जनाको ज्यान गएको छ भने ३ सय १३ जना घाइते भएका छन् । प्रहरी प्रधान कार्यालयका अनुसार दुर्घटनाहरू काठमाडौं, सुनसरी, मकवानपुर, मोरङ र तनहुँमा भएका हुन् ।
काठमाडौंको टेकुस्थित अम्बे कम्प्लेक्स नजिक मोटरसाइकलको ठक्करबाट गम्भीर घाइते भएका भारतीय नागरिक ४५ वर्षीय परमानन्द बैठाको उपचारका क्रममा त्रिवि शिक्षण अस्पताल महाराजगन्जमा मृत्यु भएको छ । सुनसरीको इटहरीमा बसले ठक्कर दिँदा मोटरसाइकल चालक ६२ वर्षीय छत्रबहादुर भण्डारीको ज्यान गएको छ ।
यस्तै, मकवानपुरको बकैयामा ब्रेक फेल भई अटो दुर्घटना हुँदा ४५ वर्षीय सन्तबहादुर माझीको मृत्यु भएको छ भने मोरङको लेटाङमा मोटरसाइकलको ठक्करबाट ७० वर्षीय बलबहादुर विकको ज्यान गएको छ । तनहुँको व्यास नगरपालिकामा कारको ठक्करबाट ४० वर्षीय एक पुरुषको मृत्यु भएको छ, तर उनको पहिचान खुलेको छैन ।
चाडपर्वको बेला सवारी चाप बढ्ने भएकाले प्रहरीले थप सतर्कता अपनाउन चालकहरूलाई आग्रह गरेको छ ।
