काठमाडौं । आगामी आईसीसी यू–१९ महिला टी–२० विश्वकपको तयारीलाई तीव्रता दिँदै नेपाली यू–१९ महिला क्रिकेट टोलीले विश्वकपअघि दुईवटा अन्तर्राष्ट्रिय प्रतियोगितामा भाग लिने भएको छ । नेपाल क्रिकेट संघ (क्यान) ले यसबारे औपचारिक जानकारी सार्वजनिक गरेको हो ।
क्यानका सचिव पारस खड्काद्वारा जारी गरिएको विज्ञप्तिअनुसार नेपाली टोली पहिले चीनमा आयोजना हुने ‘बेल्ट एन्ड रोड यू–१९ गर्ल्स टी–२०आई’ प्रतियोगितामा उत्रनेछ । सन् २०२६ को नोभेम्बर ३ देखि ८ सम्म चल्ने यो प्रतियोगितामा आयोजक चीनसँगै नेपाल, हङकङ र थाइल्यान्डका टोलीहरूबीच प्रतिस्पर्धा हुनेछ ।
यसपछि नेपाली टोली भारततर्फ लाग्नेछ । नोभेम्बर १० देखि २२ सम्म भारतको बेङ्गलुरुमा आयोजना हुने त्रिदेशीय शृङ्खलामा नेपालसहित भारत यू–१९ महिला ‘ए’ र भारत यू–१९ महिला ‘बी’ टोलीबीच खेल हुनेछ ।
लगातार दुई अन्तर्राष्ट्रिय प्रतियोगिता खेल्न पाउँदा टोलीले प्रतिस्पर्धी क्रिकेटको राम्रो अनुभव हासिल गर्ने क्यानको अपेक्षा छ । विश्वकपअघि यस्ता तयारी खेलले खेलाडीहरूको आत्मविश्वास बढाउने विश्वास क्यानले लिएको छ ।
