काठमाडौं । दक्षिण अफ्रिकाका धाकड ब्याटर डेभिड मिलरले नेपाल प्रिमियर लिगको तेस्रो संस्करण कर्णाली याक्सबाट खेल्ने भएका छन् । याक्सले ३७ वर्षीय बायाँहाते मध्यक्रम ब्याटरलाई औपचारिक रूपमा टोलीमा भित्र्याएको घोषणा गरेको हो ।
छक्का प्रहार गर्ने क्षमताका लागि चिनिएका मिलर टी–२० क्रिकेटका अनुभवी फिनिसर मानिन्छन् । उनले दक्षिण अफ्रिकाका लागि १ सय ८० एकदिवसीय र १ सय ४० टी–२० अन्तर्राष्ट्रिय खेल खेलिसकेका छन् । एकदिवसीयमा उनले ४ हजार ७ सय ६२ र टी–२० अन्तर्राष्ट्रियमा २ हजार ८ सय ४ रन बनाएका छन् ।
एकदिवसीयमा उनको उच्च स्कोर १ सय ४२ र टी–२० अन्तर्राष्ट्रियमा अविजित १ सय ६ रन छ । उनले एकदिवसीयमा ८ शतक र २४ अर्धशतक तथा टी–२० अन्तर्राष्ट्रियमा २ शतक र ९ अर्धशतक बनाएका छन् ।
समग्र टी–२० क्रिकेटमा मिलरले ५ सय ८४ खेलमा १२ हजार ४ सय ३५ रन बनाएका छन् । यस अवधिमा उनले ४ शतक, ५३ अर्धशतक र ५ सय ६९ छक्का प्रहार गरेका छन् । उनले सन् २००८ मा १८ वर्षको उमेरमा प्रथम श्रेणी क्रिकेटमा पदार्पण गरेका थिए र सन् २०१० मा वेस्ट इन्डिज भ्रमणका क्रममा अन्तर्राष्ट्रिय क्रिकेटमा पदार्पण गरेका थिए ।
इन्डियन प्रिमियर लिगमा पनि मिलरले लामो समय खेलेका छन् । उनी सन् २०१३ देखि २०१९ सम्म किङ्स इलेभेन पञ्जाबमा आबद्ध थिए र सन् २०१६ मा टोलीको कप्तानीसमेत सम्हालेका थिए । सन् २०२२ मा गुजरात टाइटन्सबाट खेल्दा उनले १६ खेलमा ४ सय ८१ रन बनाएका थिए, र सोही सिजन गुजरातले पहिलो पटक आईपीएल उपाधि जितेको थियो । पछिल्लो पटक उनले सन् २०२६ को आईपीएलमा दिल्ली क्यापिटल्सबाट खेलेका थिए ।
