नेपाली कम्युनिस्ट पार्टी (नेकपा) ले कात्तिक ७ गतेदेखि चलिरहेको राष्ट्रिय जागरण अभियानका लागि नेता तथा कार्यकर्ताको कार्य विभाजन सार्वजनिक गरेको छ। पार्टीको केन्द्रीय संयोजन समिति बैठकका निर्णय समेटिएको अन्तरपार्टी निर्देशन–५ मार्फत सबै तहका नेता–कार्यकर्तालाई आ–आफ्नो मतदाता नामावली रहेको क्षेत्रमा खटाउने व्यवस्था गरिएको हो।
निर्देशनअनुसार केन्द्रीय कार्य संयोजन समितिका सदस्यहरूले आफू मतदाता रहेको प्रदेशमा जिल्ला समन्वयको जिम्मेवारी सम्हाल्नेछन्। उनीहरूले प्रदेश समितिसँग समन्वय गर्दै जिल्ला पार्टी समितिहरूसँग नियमित सम्पर्क, अनुगमन, मार्गदर्शन र सहजीकरण गर्नेछन्। यसबाट अभियान र सङ्गठनात्मक सुदृढीकरणले गति लिने पार्टीको विश्वास छ।
गत निर्वाचनमा उम्मेदवार बनेका नेताहरूलाई आफू उम्मेदवार बनेको निर्वाचन क्षेत्रमै अनिवार्य रूपमा खटिन भनिएको छ। केन्द्रीय सदस्यहरूले पालिका र वडा तहमा चल्ने अभियान टोलीको प्रत्यक्ष नेतृत्व गर्नेछन्। प्रादेशिक जिम्मेवारी नपाएका केन्द्रीय सदस्यलाई पनि मतदाता नामावली रहेको प्रदेशभित्रै परिचालन गरिनेछ।
विभाग, मोर्चा र जनवर्गीय सङ्गठनमा रहेका नेता–कार्यकर्ता पनि आफ्नै मतदाता क्षेत्रमा खटिनुपर्नेछ। विदेशमा रहेका पार्टी पङ्क्तिलाई भने उनीहरू कार्यरत देशमै अभियानसँग जोड्ने गरी सम्बन्धित प्रदेशले कार्यविभाजन मिलाउनेछ। प्रदेश समितिहरूले आफ्ना प्रदेशका केन्द्रीय सदस्यहरूसँग समन्वय गरी सङ्गठनात्मक, वैचारिक र जनपरिचालनका कामलाई प्रभावकारी बनाउने पार्टीको निर्देशन छ। अभियानलाई व्यवस्थित, प्रभावकारी र जनकेन्द्रित बनाउने उद्देश्यले यो विभाजन गरिएको पार्टीले जनाएको छ।
