चितवनमा सोमबार सञ्चारकर्मीसँग कुरा गर्दै भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावलले चाडपर्व सकिएलगत्तै भूमिहीन नागरिकका समस्या समाधान गर्ने र सहकारीपीडित बचतकर्ताको रकम फिर्ता गर्ने कामलाई तीव्रता दिइने बताएकी छन्। दुवै विषय सरकारको उच्च प्राथमिकतामा रहेको उनको भनाइ छ।
मन्त्री रावलका अनुसार सरकारले समस्याग्रस्त घोषणा गरेका सहकारीका बचतकर्तालाई रकम फिर्ता गर्ने प्रक्रिया पहिले नै सुरु भइसकेको छ। लामो समयदेखि आफ्नो बचत फिर्ता पाउन नसकेर पीडामा रहेका नागरिकलाई सकेसम्म छिटो रकम उपलब्ध गराउने गरी कामलाई अझ तीव्र बनाउनुपर्ने उनले बताइन्।
भूमिहीन नागरिकको हकमा विगतमा कानुनी व्यवस्थाका कारण उनीहरू बसेकै ठाउँमा व्यवस्थापन गर्न कठिनाइ भएको थियो। तर अध्यादेशमार्फत ती कानुनी अड्चन हटाइसकिएको र आवश्यक नीतिगत सुधारसहित काम अघि बढाइएको मन्त्री रावलले जानकारी दिइन्।
आफू बसेको ठाउँबाट हटाइने वा डोजर चलाइने हो कि भन्ने त्रास भूमिहीन नागरिकमा रहेको उल्लेख गर्दै उनले सरकारले गरिरहेको काम र आगामी योजनाबारे उनीहरूलाई स्पष्ट जानकारी दिन आवश्यक रहेको बताइन्। यही उद्देश्यले आफू चितवन आएको उनको भनाइ छ।
मन्त्रीले जनताका समस्या सुन्न र समाधानका लागि पहल गर्न सरकार जनताकै बीचमा पुग्नुपर्ने मान्यताअनुसार आफूले चितवनमा भूमिहीन नागरिक र सहकारीपीडित बचतकर्तासँग भेटेर उनीहरूका गुनासा, सुझाव र समस्या समाधानको अवस्थाबारे जानकारी लिएको बताइन्।
आगामी कार्ययोजनाबारे उनले चाडपर्वपछि भूमिहीन नागरिकका समस्या समाधान गर्ने काम आक्रामक रूपमा अघि बढ्ने र यो काम चितवनमा मात्र सीमित नरही देशभरि तीव्रताका साथ चल्ने बताइन्। समस्या समाधानको सुरुवाती चरण पार गरेर अब कामलाई तीव्रता दिने दोस्रो चरणमा प्रवेश गरिएको उनको भनाइ छ।
