काठमाडौंमा जारी नेपाल प्रिमियर लिग (एनपीएल) को तेस्रो संस्करणमा इङ्ग्ल्यान्डका अनुभवी ब्याटर डेभिड मलान फेरि चितवन राइनोजको टोलीमा फर्किएका छन्। टेस्ट र एकदिवसीय क्रिकेटमा शतक बनाइसकेका बायाँहाते ब्याटर मलानले यस संस्करणमा पनि राइनोजकै जर्सी लगाएर मैदान उत्रने भएका हुन्।
राइनोजले मंगलबार मध्याह्न विराटनगर किङ्ससँग खेल्दैछ। टोलीका निर्देशक प्रताप देवकोटाका अनुसार आक्रामक र भरपर्दो ब्याटिङका लागि चिनिने मलानलाई पुनः टोलीमा ल्याइएको हो। मलानले अघिल्लो संस्करणमा पनि यही टोलीबाट खेलेका थिए।
मलान अन्तर्राष्ट्रिय क्रिकेटमा परिचित नाम हुन्। इङ्ग्ल्यान्डले सन् २०२२ को टी-२० विश्वकप जित्दा उनी टोलीका महत्त्वपूर्ण सदस्य थिए। उनी बायाँ हातले ब्याटिङ गर्छन् र लेगब्रेक बलिङ पनि गर्न सक्छन्। अन्तर्राष्ट्रिय टी-२० वरियतामा उनी शीर्ष स्थानसम्म पुगिसकेका छन्।
तथ्याङ्कले पनि उनको अनुभव देखाउँछ। टेस्ट क्रिकेटमा उनले एक हजार ७४ रन बनाएका छन् र उनको सर्वाधिक स्कोर १४० रन हो। एकदिवसीय क्रिकेटमा ३० खेलमा उनले एक हजार चार सय ५० रन जोडेका छन्, जसमा सर्वाधिक १४० रन छ। टी-२० अन्तर्राष्ट्रियमा ६२ खेल खेल्दै उनले एक हजार आठ सय ९२ रन बनाएका छन् भने सर्वाधिक १०३ रन बनाएका छन्।
एनपीएलको पहिलो संस्करणमा चौथो स्थानमा रहेको चितवन राइनोज दोस्रो संस्करणमा सातौं स्थानमा झरेको थियो। अनुभवी विदेशी ब्याटरको पुनरागमनले यसपटक टोलीको प्रदर्शनमा सुधार आउने अपेक्षा गरिएको छ।
