तेह्रथुमको फेदाप गाउँपालिकाले मझिया स्मृति कप महिला फुटबल प्रतियोगितामा शानदार प्रदर्शन गर्दै सेमिफाइनलमा स्थान बनाएको छ। संखुवासभाको मादीमा मंगलबार सम्पन्न क्वार्टरफाइनल भिडन्तमा फेदापले धनकुटाको डीवाईसी साँगुरीगढीलाई ४–० ले हरायो।
खेल सुरु भएको एक मिनेट नबित्दै अनिता राना मगरले गोल गरेपछि फेदापले सुरुआती अग्रता लियो। सोह्रौँ मिनेटमा उनले फेरि गोल गरिन्। त्यसपछि २१औँ मिनेटमा पेन्जु राईले टोलीको अग्रता तीन गोलमा पुर्याइन्। दुई मिनेटपछि अनिताले आफ्नो तेस्रो गोल पूरा गर्दै ह्याट्रिक पूरा गरिन् र फेदापको जित पक्का भयो। बाँकी समयमा साँगुरीगढीले गोल फर्काउन सकेन। ह्याट्रिक खेलेकी अनिता खेलको उत्कृष्ट खेलाडी घोषित भइन्।
चैनपुर नगरपालिकाकी उपप्रमुख एलिना श्रेष्ठ उक्त खेलमा प्रमुख अतिथिका रूपमा उपस्थित थिइन्। स्वर्गीय मानबहादुर जिमी ‘मझिया’ को सम्झनामा आयोजना गरिएको यो प्रतियोगिता मझिया मानबहादुर जिमी स्मृति प्रतिष्ठानको आयोजना र हाङ्थुम क्लबको सहआयोजनामा भइरहेको छ। नौ खेलाडी सहभागी हुने यस प्रतियोगितामा आठ टोली प्रतिस्पर्धामा छन्।
प्रतियोगिताको विजेता टोलीले तीन लाख रुपैयाँ प्राप्त गर्नेछ भने दोस्रो हुने टोलीले एक लाख ५० हजार रुपैयाँ पाउनेछ। सर्वोत्कृष्ट खेलाडीले २१ हजार रुपैयाँ पाउनेछन् भने सर्वाधिक गोलकर्ता र उत्कृष्ट गोलरक्षकले जनही १० हजार रुपैयाँ प्राप्त गर्नेछन्। प्रतियोगिताको अन्तिम क्वार्टरफाइनलमा बुधबार ललितपुरको सातदोबाटो युथ क्लब र इलामको ओएसिस क्लबबीच प्रतिस्पर्धा हुनेछ।
