नेपाल प्रिमियर लिगको तेस्रो संस्करणमा सुदूरपश्चिम रोयल्सले बुधबार आफ्नो पहिलो सफलता हात पारेको छ। पोखरा एभेन्जर्सविरुद्धको खेलमा टोलीले ६ विकेटको फराकिलो अन्तरले जित निकाल्दै अघिल्लो खेलको हार बिर्साएको छ।
१४६ रनको लक्ष्य पछ्याएको सुदूरपश्चिमले १६ ओभर ५ बल खेल्दै ४ विकेटको क्षतिमा आवश्यक रन पूरा गर्यो। यसअघि पहिलो खेलमा लुम्बिनी लायन्ससँग १९ रनले हारेको टोलीले दोस्रो खेलमा भने आत्मविश्वासपूर्ण प्रदर्शन गर्यो।
जितको आधार कप्तान दीपेन्द्रसिंह ऐरीको धैर्यपूर्ण र आक्रामक ब्याटिङ बन्यो। उनले ३६ बल सामना गर्दै नटआउट ५१ रन बनाए। उनलाई इशान पाण्डेले ३१ बलमा ३७ रन बनाएर राम्रो साथ दिए भने ब्रान्डन म्याकमलेनले १२ बलमा २२ रनको छोटो तर प्रभावकारी पारी खेले।
यसअघि टस गुमाएर ब्याटिङमा उत्रिएको पोखराले २० ओभरमा ७ विकेट गुमाएर १४५ रन मात्र बनाउन सकेको थियो। अर्जुन घर्तीले २५ बलमा अविजित ४० रन बनाएर टोलीलाई सम्मानजनक स्थितिमा पुर्याए। मेहेदी हसनले २१ बलमा ४ चौका र १ छक्कासहित ३२ रन जोडे भने कप्तान कुशल मल्लले १७ बलमा २१ रन बनाए।
बलिङमा सुदूरपश्चिमका अनिल खरेलले ३ विकेट लिएर पोखराको ब्याटिङमा दबाब सिर्जना गरे। दीपेन्द्रसिंह ऐरी, स्कट कुगेलेन र हेमन्त धामीले एक-एक विकेट लिए।
जितपछि सुदूरपश्चिमले प्रतियोगितामा अंकको खाता खोलेको छ भने पोखराले यस संस्करणको पहिलो खेलमै हार बेहोर्नुपरेको छ। बिहीबार जनकपुर बोल्ट्स र काठमाडौँ गोर्खाज तथा विराटनगर किङ्स र कर्णाली याक्सबीच खेल हुनेछन्। आठ टोली सहभागी प्रतियोगिता मंसिर ५ गतेसम्म चल्नेछ।
