मकवानपुरमा चाडपर्वका लागि सञ्चालन गरिएको सहुलियत मूल्यको पसलबाट आठ लाख रुपैयाँभन्दा बढीको खाद्यान्न बिक्री भएको छ। साल्ट ट्रेडिङ कर्पोरेसन लिमिटेडको मकवानपुर कार्यालयले असोज १ गतेदेखि कार्यालय परिसरबाटै छुट मूल्यमा नुन, चिनी, तेल र मैदा बिक्री गरिरहेको छ। सरकारको निर्देशनअनुसार सुरु गरिएको यो बिक्री दसैँ बिदाको अवधिसम्म चल्दा उल्लेख्य कारोबार भएको कार्यालय प्रमुख मधुसुधन अधिकारीले जानकारी दिएका छन्।
छुटको सुविधा सबै सर्वसाधारणसम्म समान रूपमा पुगोस् भन्ने उद्देश्यले प्रतिव्यक्ति बिक्रीमा सीमा तोकिएको थियो। सो व्यवस्थाअनुसार एक व्यक्तिले छ पोका नुन, छ किलो चिनी, पाँच लिटर तेल र पाँच किलो मैदा किन्न पाउँथे। बजार मूल्यको तुलनामा चिनीमा प्रतिकिलो पाँच रुपैयाँ, नुनमा दुई रुपैयाँ, मैदामा सात रुपैयाँ र तेलमा प्रतिलिटर सात रुपैयाँ छुट दिइएको थियो।
यस अवधिमा ६० बोरा चिनी बिक्री भयो, जसमा प्रत्येक बोराको तौल ५० किलो थियो। त्यसैगरी १० क्विन्टल नुन, सात क्विन्टल पिठो तथा मैदा र ५०० लिटर तेल बिक्री भएको कार्यालयले जनाएको छ। चाडपर्व लक्षित सहुलियत बिक्री कात्तिक मसान्तसम्म जारी रहने अधिकारीले बताएका छन्।
साल्ट ट्रेडिङले असोज १ गतेदेखि दसैँ, तिहार र छठ पर्वलाई लक्षित गरेर सहुलियत पसल सञ्चालनमा ल्याएको हो। यस्ता पसल विर्तामोड, विराटनगर, राजविराज, लहान, जनकपुर, वीरगञ्ज, हेटौँडा, नारायणगढ, त्रिशूली, पोखरा र बागलुङमा सञ्चालन भइरहेका छन्।
