असोज २५ मा आएको बाढीले गोरखाको धार्चे गाउँपालिका–५ स्थित माछाखोलामा ठूलो क्षति पुर्याएको छ। बाढीले घर, गोदाम र व्यापारिक संरचना बगाएपछि स्थानीय व्यापारी करोडौँ रुपैयाँको क्षति व्यहोर्न बाध्य भएका छन्। विस्थापित स्थानीयले राहतसँगै सुरक्षित बस्ती र नदी नियन्त्रणको माग गरेका छन्।
स्थानीय व्यापारी लालप्रसाद गुरुङका अनुसार बाढीले उनको गोदाममा मात्र करिब दुई करोड रुपैयाँ बराबरको क्षति भएको छ। १५–२० वर्षदेखि व्यापारमा लगानी गरेको सम्पत्ति एकैपटक बगाएपछि उनी आर्थिक सङ्कटमा परेका छन्। उनका अनुसार अर्का व्यापारी धनकुमार गुरुङको पाँचदेखि छ करोड र बिश गुरुङको गोदाममा करिब १० करोड रुपैयाँ बराबरको क्षति भएको छ। यी क्षतिको विस्तृत विवरण भने सम्बन्धित निकायबाट पुष्टि हुन बाँकी छ।
बाढीले तीन–चारवटा घर बगाएको र केही परिवार विस्थापित भएको गुरुङले बताए। घर गुमाएका स्थानीय छिमेकी र आफन्तको आश्रयमा बसिरहेका छन्। बाढी आउनुअघि माथिल्लो क्षेत्रबाट फोनमार्फत भाग्न खबर आएपछि उनीहरू चप्पल मात्र लगाएर घरबाट निस्किएका थिए।
बाढीले माछाखोलाबाट केरौँजा जाने पुलसमेत पूर्ण रूपमा क्षति पुर्याएको छ। दसैँ–तिहारलगत्तै झोलुङ्गे पुल बनाउने कुरा भए पनि औपचारिक निर्णय र समयबारे पुष्टि हुन बाँकी छ। गाउँपालिकाले राहत दिन थाले पनि व्यापारिक गोदामको क्षतिमा कस्तो सहयोग पाइन्छ भन्ने स्पष्ट नभएको व्यापारीको गुनासो छ। स्थानीयले राहतसँगै ग्याबियन वाल र सुरक्षित बस्तीको माग गरेका छन्।
