टोकियो । रुसको कामचट्का प्रायद्वीप नजिक शुक्रबार गएको भूकम्पपछि जापानको मौसम विज्ञान एजेन्सीले गल्तीले ९.९ म्याग्निच्युडको भूकम्प आउने चेतावनी जारी गरेको छ । एजेन्सीले करिब आठ मिनेटपछि उक्त चेतावनी फिर्ता लिएको छ ।युरोपेली–भूमध्यसागरीय भूकम्प मापन केन्द्र (ईएमएससी) का अनुसार कामचट्का क्षेत्रमा ७.० म्याग्निच्युडको भूकम्प गएको थियो । जापानी एजेन्सीले भने उक्त भूकम्पलाई ६.९ म्याग्निच्युड मापन गरेको थियो । भूकम्प जमिनको सतहबाट करिब १६० किलोमिटर गहिराइमा गएको थियो ।भूकम्पपछि शुक्रबार दिउँसो १२:४० बजे एजेन्सीले होक्काइडोदेखि मध्य जापानको तोकाई क्षेत्रसम्म शक्तिशाली कम्पन आउन सक्ने चेतावनी जारी गरेको थियो । त्यसपछि सार्वजनिक सूचना प्रणाली र मोबाइल फोनमा अलार्म बजेको थियो । दिउँसो १२:४८ बजे एजेन्सीले चेतावनी रद्द गर्‍यो ।प्रणालीले भूकम्पको केन्द्रविन्दु कुरिल टापु आसपास रहेको गलत अनुमान गर्नुका साथै म्याग्निच्युड पनि वास्तविकभन्दा धेरै आकलन गरेको प्रवक्ताले बताएका छन् । घटनाको कारणबारे अनुसन्धान भइरहेको छ ।जापानमा वास्तविक रूपमा शक्तिशाली कम्पन महसुस भएन । सुनामीसम्बन्धी चेतावनी पनि जारी गरिएको थिएन ।कामचट्का प्रायद्वीप प्रशान्त महासागरको ‘रिङ अफ फायर’ भनिने भूकम्प सक्रिय क्षेत्रको हिस्सा हो । सन् २०२५ जुलाई २९ मा यस क्षेत्रमा ८.८ म्याग्निच्युडको शक्तिशाली भूकम्प गएको थियो ।