काभ्रेपलाञ्चोक । काठमाडौंबाट ओखलढुंगा जाँदै गरेको यात्रुबाहक बस सिन्धुलीको खुर्कोटमा दुर्घटनामा परेको छ ।शुक्रबार दिउँसो सिन्धुलीको गोलञ्जोर गाउँपालिका–७, ट्रायल सेन्टर अगाडि उक्त बस दुर्घटनामा परेको हो । दुर्घटनामा ९ जना यात्रु सामान्य घाइते भएका छन् ।प्रहरीका अनुसार खाना खाएर यात्रु चढाउने क्रममा बा.प्र.०३–००१ ख.२७७४ नम्बरको बस पछाडि लैजाँदा दुर्घटना भएको थियो । बसको पछाडिको चक्का अचानक नालामा परेपछि बस सडकबाट अन्दाजी १० मिटर तल खसेको थियो ।घाइते ९ जनालाई उद्धार गरी शुभजीवन अस्पताल खुर्कोट र सुनकोशी सामुदायिक अस्पताल खुर्कोट पठाइएको जिल्ला प्रहरी कार्यालयका सूचना अधिकारी विजय श्रेष्ठले जानकारी दिए ।चाडपर्वको समयमा यात्रुको चाप बढेकाले सडक सुरक्षामा विशेष सावधानी अपनाउन प्रहरीले अनुरोध गरेको छ ।