नेपाल प्रिमियर लिग (एनपीएल) २०२६ मा आज शनिबार लुम्बिनी लायन्स र चितवन राइनोज आमनेसामने हुँदैछन्। कीर्तिपुरस्थित त्रिवि क्रिकेट मैदानमा दिउँसो साढे १२ बजे हुने खेलमा दुवै टोली लगातार दोस्रो जितको खोजीमा हुनेछन्।
लुम्बिनीले आफ्नो पहिलो खेलमा सुदूरपश्चिम रोयल्सलाई सात विकेटले हराएको थियो भने चितवनले विराटनगर किङ्सलाई आठ रनले पराजित गर्दै प्रतियोगितामा विजयी सुरुवात गरेको थियो। दुवै टोली जितको लयलाई निरन्तरता दिन चाहन्छन्, तर मौसमले खेलमा बाधा पुर्याउने सम्भावना छ। अर्नब चक्रवातको प्रभावले बिहीबार रातिदेखि देशभर वर्षा भइरहेको छ र शनिबार साँझसम्म हल्का वर्षा हुने पूर्वानुमान छ। वर्षाका कारण खेल हुन नसके दुवै टोलीले एक–एक अंक बाँड्नेछन्।
लुम्बिनी अघिल्लो सिजनको पाँचौं खेलदेखि अपराजित छ र लगातार छ खेल जितेको छ। यसअघिका दुई सिजनमा भएका दुवै भेटमा लुम्बिनीले चितवनलाई हराएको थियो — पहिलो सिजनमा ३३ रनले र दोस्रो सिजनमा चार विकेटले। त्यसैले चितवन आज पुरानो नतिजा बदल्न चाहन्छ।
लुम्बिनीका विदेशी खेलाडी रुबेन ट्रम्पलमन अझै टोलीमा आइपुगेका छैनन्। उनी आयरल्यान्डविरुद्धको एकदिवसीय शृङ्खला खेलिरहेका छन्। कप्तान रोहित पौडेलको नेतृत्वमा डार्शी शर्ट, शमिम होसेन, निरोशन डिक्वेला र शाड्ली भान शाकवाइकसहितको टोली मैदान उत्रने सम्भावना छ। पहिलो खेलमा चार विकेट लिएका किशोर महतो लुम्बिनीका प्रमुख हतियार हुनेछन्।
यता चितवनका कप्तान कुशल मल्ल पहिलो खेलमा चोटका कारण खेलेका थिएनन्। उनी आज फर्कने सम्भावना छ, जसले टोलीको ब्याटिङलाई बलियो बनाउन सक्छ। सिकन्दर राजा अझै टोलीमा आइपुगेका छैनन्। कमलसिंह ऐरी र डाविड मलान चितवनका भरपर्दा खेलाडी हुनेछन्।
