काठमाडौं। आइसल्यान्डमा बसोबास गर्ने नेपाली समुदायले भोटेकोशी बाढीबाट प्रभावित परिवारको राहत तथा पुनःस्थापनाका लागि करिब ५० लाख १९ हजार रुपैयाँ बराबरको सहयोग संकलन गरेका छन्। यो अभियानको नेतृत्व आइसनेपाली समाजले गरेको हो।
आइसल्यान्डको रोटरी क्लबले थप १० लाख क्रोनाको सहयोग दिने घोषणा गरेसँगै कुल संकलन ३९ लाख ८८ हजार ५९४ आइसल्यान्डिक क्रोना पुगेको छ।
यसअघि नै २९ लाख ८८ हजार ५९४ क्रोना अर्थात् करिब ३७ लाख ६१ हजार रुपैयाँ गत अक्टोबर ५ मा नेपालको प्रधानमन्त्री दैवी प्रकोप उद्धार कोषमा पठाइसकिएको समाजले जनाएको छ। रोटरी क्लबको १० लाख क्रोना (करिब १२ लाख ५८ हजार रुपैयाँ) थपिएपछि कुल रकम करिब ५० लाख १९ हजार रुपैयाँ पुग्ने भएको छ।
बाढीमा ज्यान गुमाएकाप्रति समाजले समवेदना प्रकट गरेको छ भने शोकमा परेका परिवारप्रति सहानुभूति र घाइते तथा प्रभावितको शीघ्र स्वास्थ्य लाभको कामना गरेको छ।
च्यारिटी कार्यक्रममा प्रत्यक्ष–अप्रत्यक्ष रूपमा सहयोग पुर्याउने विभिन्न कम्पनी, संस्था, व्यक्तिगत दाता, स्वयंसेवक तथा सहयोगीहरूलाई समाजले धन्यवाद दिएको छ। विशेषगरी एमएस आइसल्यान्ड, सिन्द्रा फिस्कुर, रोटरी क्लब र हिमालयन स्पाइसलाई धन्यवाद ज्ञापन गरिएको छ।
