जलवायु अनुकूलनका लागि अन्तर्राष्ट्रिय स्रोत परिचालन गर्ने अनुकूलन कोषको ४७औँ बोर्ड बैठकले नेपालका तीन वटा परियोजनाका प्रस्ताव स्वीकृत गरेको छ। बैठकमा नेपालका तर्फबाट कोषका बोर्ड सदस्य नरेश शर्माले सहभागिता जनाएका थिए।
स्वीकृत परियोजनामध्ये पहिलो हो—राष्ट्रिय प्रकृति संरक्षण कोषले कार्यान्वयन गर्ने ‘ग्रीन कोशी’ परियोजना। यसका लागि ९९ लाख २७ हजार ७५० अमेरिकी डलरको अवधारणापत्र स्वीकृत भएको छ। यो परियोजनाले प्रकृतिमा आधारित उपायमार्फत जलवायु उत्थानशीलता बढाउन र पारिस्थितिकीय प्रणालीको संरक्षणमा केन्द्रित हुनेछ।
अर्को स्वीकृत प्रस्ताव अन्तर्राष्ट्रिय एकीकृत पर्वतीय विकास केन्द्र (इसिमोड) ले कार्यान्वयन गर्ने ‘सेफ निब’ परियोजनाको हो। हिन्दुकुश हिमालय क्षेत्रमा जलवायु अनुकूलन अभिवृद्धि र बाढीपहिरोको पूर्वसूचना प्रणाली मजबुत बनाउने उद्देश्यसहितको यस परियोजनाको ३० करोड अमेरिकी डलर प्रस्तावित बजेटसहित पूर्व-अवधारणापत्र स्वीकृत भएको छ।
त्यसैगरी, संयुक्त राष्ट्रसङ्घीय मानव बस्ती कार्यक्रम (यूएन-ह्याबिट्याट) ले लुम्बिनी प्रदेशमा सञ्चालन गर्ने परियोजनाको करिब ४९ लाख ९९ हजार अमेरिकी डलरको अवधारणापत्र पनि स्वीकृत भएको छ। यो परियोजनाले स्थानीय नेतृत्वमा प्रकृतिमा आधारित जलवायु कार्यमार्फत उत्थानशील समुदाय निर्माण गर्ने लक्ष्य राखेको छ।
स्वीकृत परियोजनाहरूले जलवायु परिवर्तनका जोखिममा रहेका समुदायको उत्थानशीलता बढाउन, प्रकृतिमा आधारित समाधान प्रवद्र्धन गर्न र बाढीपहिरोको पूर्वसूचना प्रणालीलाई सुदृढ पार्न सघाउने अपेक्षा गरिएको छ।
यसैबीच, भोटेकोशी क्षेत्रमा विपद्पछिको व्यवस्थापन, पुनर्स्थापना तथा पुनर्निर्माणका लागि अन्तर्राष्ट्रिय जलवायु अनुकूलन वित्त परिचालन गर्ने विषयमा भने यस बैठकमा निर्णय हुन सकेन। समय अभावका कारण उक्त विषय आगामी वैशाखमा हुने बोर्ड बैठकमा छलफल तथा निर्णयका लागि एजेन्डाका रूपमा स्वीकृत गरिएको छ। यस पहलले भोटेकोशी विपद्बाट प्रभावित समुदायको पुनर्स्थापना र पुनर्निर्माणका लागि अन्तर्राष्ट्रिय जलवायु वित्तको पहुँच विस्तारमा सहयोग पुग्ने विश्वास गरिएको छ।
